DILI, 26 Maiu 2023(TATOLI) – Xefe Departamentu Emerjénsia Hospitál Nasionál Guido Valadares (HNGV), Eldegar Martins, dehan HNGV selebra loron mundiál emerjénsia no husu ba populasaun atu koopera ho profisionál saúde sira atu servi nafatin pasiente ho di’ak.
“Servisu emerjénsia ne’e importante tebes, ami hakarak husu ba komunidade atu koopera nafatin ho ami, hodi servi ita-nia pasiente sira ho di’ak”, Xefe Departamentu Emerjénsia HNGV Eldegar Martins, dehan iha HNGV, ohin.
Nia informa, fasilidade emerjénsia naton ona, hanesan sistema ne’ebé estabelese ona iha fatin, sasan sira ne’ebé presiza mak aimoruk, funsionariu ka pesoál saúde sira no fasilidade ka espasu ne’ebé natón maibé ida ne’e presiza aumenta tan.
“Ita haree ba fasilidade ita-nia, espasu sei kiik oan tanba kada loron pasiente sira mai barak demais kada loron, pasiente ne’ebé mai iha emerjénsia mínimu liubá 87-200 resin fasilidade kama iha laran 35 de’it maibé fiar katak iha tempu, ita sei iha fasilidade edifisiu administrasaun sei oferese ba ita hodi jere di’ak liután”, nia esplika.
Jornalista : Felicidade Ximenes
Editór : Zezito Silva
