Komandu PNTL sei selebra despedida membru 158 ne’ebé reforma

DILI, 25 maiu 2023 (TATOLI) – Komandante Komandu Pesoál no Formasaun, Superintendente Xefe Polísia, Arquimino Ramos, hateten Komandu Polísia Nasionál Timor-Leste (PNTL) sei organiza serimónia bo’ot hodi despede membru PNTL 158 ne’ebé reforma.
“Komandu sei organiza serimónia ida ba membru PNTL sira ne’e atu reforma tinan ne’e. Tanba instituisaun PNTL ne’e ami mak hamutuk tanba ne’e mak kuandu sira sai ne’e tenke liuhosi serimónia ida no ida ne’e serimónia reforma ba PNTL dahuluk, entaun tenke liuhosi serimónia ida atu valoriza no dignifika sira nia dedikasaun”, Superintendente Xefe Polísia, Arquimino Ramos hateten ba jornalista sira iha monumentu PNTL Caicoli, kinta ne’e.
Membru PNTL ne’ebé sei passa ba reforma hamutuk 158 no sira ne’e Superintendente Xefe iha nain-hitu, hirak ne’e nia vida sei garantia.
“Membru ne’ebé reforma sira hetan direitu tuir lei rejime tranzitóriu sira hetan nafatin no sira hetan mós direitu hosi rejime kontributóriu ne’ebé sira kontribui, hahú iha 2017. Ita bo’ot hatene katak membru PNTL ne’ebé ho diviza Superintendente Xefe ho salariu $700-resin, sira kontribui ona rejime kontributóriu iha kedan momentu ne’ebá, entaun kuandu nia reforma sei simu osan $500 hodi nia rejime kontributóriu”, Arquimino dehan.
Nia dehan, Komandu PNTL halo hela verifikasaun ba dokumentu membru PNTL ne’ebé atu reforma.
“Komandu halo hela verifikasaun ba dokumentu membru PNTL ne’ebé atu reforma. Hosi Komandu Pesoál Formasaun verifika hela membru sira-nia dadus hodi haruka ba Ministériu Solidadridade Sosiál hodi prosesa membru sira ne’ebé passa ba reforma atu direitu pensaun”, nia informa.
Komandante Arquimino hateten, membru PNTL ne’ebé mak atu reforma, komandu sei la husik leet tanba haree ba sira-nia kontribuisaun no dedikasaun sira.
“Sim, aleinde sira hetan direitu ba rejime kontributóriu nia mós sei hetan direitu nafatin hodi hetan osan rejime trasitóriu bainhira nia reforma hosi PNTL tanba antes ne’e nia hanesan membru PNTL”, nia konklui.
Jornalista: Natalino Costa
Editór : Zezito Silva

