DILI, 26 maiu 2023 (TATOLI) – Inspetór Jerál Autoriedade Inspesaun no Fiskalizasaun Atividade Ekonómiku, Sanitária no Alimentár (AIFAESA), Ernesto Monteiro, informa mina symphoni ne’ebé testa iha BPOM Kupang hatudu rezultadu negativu.
Rezultadu teste ne’e aprezenta hosi ekipa konjunta husi Autoriedade Inspesaun no Fiskalizasaun Atividade Ekonómiku, Sanitária no Alimentár (AIFAESA) no Ministériu Saúde, Ministériu Turizmu Komérsiu no Indústria (MTCI).
“Relasiona ho akontesimentu iha fulan marsu tinan 2023, ba família rua ne’ebé hela iha Aldeia Fatumeta no Aldeia Rio de Janeiro, Suku Bairo-Pité, Postu Administrativu Dom Aleixo, ne’ebé hola mina ho marka symphoni ba konsumu, ikus mai família rua ne’ebé konsumu mina refere hetan moras oioin, hanesan’ kabun moras, isin katar no seluk tan ne’ebé sira aprezenta katak deskonfia kauza mai husi konsumu mina ho marka symphoni, husi ne’e ekipa konjunta lori amostra ba teste iha BPOM Kupang ho rezultadu negativu”, Ernesto Monteiro informa liuhosi konferénsia imprensa iha Matadouro, ohin.
“Aleinde teste mikrobiolójiku ami mós halo kordenasaun ho Laboratóriu BPOM, hodi halo teste ba parámetru kompletu hanesan fíziku, kímiku no mikrobiolójiku. Ikus mai rezultadu hatudu katak la deteta substánsia fízika no kímika perigoza husi produtu refere”, nia subliña.
Tanba ne’e, rejultadu Laboratóriu LNS no BPOM hatudu katak mina tein ho marka symphoni bele konsumu tanba livre hosi kontaminasaun fíziku, kímiku no mikrobiolójiku.
Mina symphoni bele konsumu no komersializa iha estabelesimentu komersiál sira, envenenamentu ne’ebé kauza moras ka alerjia ba vítima (konsumidor) sira laiha relasaun ho kualidade no seguransa hosi mina symphoni.
Nia enkoraja operadór ekonómiku no konsumidór sira atu bele servisu hamutuk ho autoriedade kompetente sira hodi bele garante ai-han ne’ebé kualidade no seguru ba konsumu umanu.
Jerente Empreza Kómiko Timor, Josua Prayugo hateten, ho rezultadu mina symponi ne’ebé mak negativu mina refere sei kontinua faan fila fali ba konsumidor sira.
“Ohin ita rona rezultadu hamutuk katak mina ne’e negativu entaun husi ami katak iha semana ne’e ami sei distribui fila fali ba loja sira atu faan mina ne’e ba públiku tanba mina ne’e rasik durante ami hatama husi Surabaya Indonézia”, Josua Prayugo konklui.
Mina Symphoni refere hala’o teste iha Laboratóriu BPOM Kupang ho durasaun fulan ida ho kustu $562.
Jornalista : Felicidade Ximenes
Editór : Zezito Silva
