Top

Governu apresia susesu autoriedade seguransa iha períodu kampaña no eleisaun parlamentár

Vise-Ministru Interiór, António Armindo. Imajen Tatoli/Francisco Sony

DILI, 27 maiu 2023 (TATOLI) – Governu ne’ebé lideradu hosi Taur Matan Ruak kongratula servisu Polísia Nasionál Timor-Leste (PNTL) tanba bele garante ona estabilidade ámbitu kampaña no eleisaun parlamentár.

“Ha’u lori ministru interiór hanesan mós primeiru-ministru nian naran, hakarak parabeniza ba komandante jerál ho segundu komandante jerál foun, komandante sira, membru polísia. Ita bo’ot sira nia servisu di’ak durante kampaña no mós eleisaun. Ita-nia seguransa tinan ida ne’e di’ak liu, kompara ho tinan anteriormente, tanba ne’e mai ita basa liman PNTL”, Vise Ministru Interiór António Armindo, hateten liuhosi nia mensajen bainhira partisipa iha serimónia tinan 20 aniversáriu Unidade Polísia Marítima (UPM), iha Seonál Dili, sabadu, ohin.

Nia lori Governu nia naran, hakarak parabeniza mós institusaun PNTL, F-FDTL, Servisu Informasaun Polísia, Servisu Nasionál Intelijénsia ne’ebé mak fó seguransa durante kampaña no eleisaun.

António agradese mós ba sidadaun tomak ne’ebé mak iha konsiénsia tomak, kontribui seguransa interna hodi kontribui ba estabilidade no pás durante kampaña no eleisaun.

“Timor-Leste iha mudansa bo’ot ke hotuhotu iha konsiénsia katak problema perturbasaun, la’os ona ita-nia hahan loroloron ne’ebé tau iha bikan. Ida ne’e maka Timor-Leste hatudu ke sira iha maturidade polítika mak kontribui, só úniku polítiku sira halo de’it koalia programa no laiha perturbasaun públiku. Ida ne’e mudansa bo’ot ida”, nia kongratula.

Governante ne’e parabeniza no agradese ba parseiru sira hanesan TLPDP, Embaixada Japaun, JICA, Embaixada Xina no Embaixada Estadus Unidus Amérika.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!