DILI, 29 maiu 2023 (TATOLI) – Ministériu Edukasaun, Juventude no Desportu (MEJD) prevee ona verba $455.714 ba elaborasaun giaun ba profesór sira no manuál ba alunu sira atu fó ekivalénsia ba estudante 12.o anu. Giaun ne’e sei elabora husi peritu na’in-rua durante fulan ualu.
Diretór Nasionál Ensinu Rekorrente, Quintão da Costa Massa, hatete MEJD loke ona vaga ba rekrutamentu ba peritu rua ne’e iha maiu no sei remata iha juñu. Vaga ne’e sei oferese ba peritu internasionál ida hodi haree ba kestaun jurídiku kurríkulu no nasionál ba konsulta téknika pedagójika no kurríkulu.
“Ita presiza atu hamosu tan eskola ekivalénsia nivel sekundáriu, tanba durante ne’e foin maka to’o de’it ensinu báziku terseiru siklu. Tanba ne’e maka ita loke oportunidade ida ne’e hodi rekruta peritu na’in-rua atu prepara materiál sira ba futuru”, dirijente ne’e refere ba Tatoli iha Vila Verde, segunda ne’e.
Quintão da Costa salienta diresaun ensinu rekorrente maka sei apoia prosesu ensinu aprendizajen ba eskola naun formál sira hodi prepara kondisaun ba estudante sira atu bele enkaixa filafali edukasaun formál iha futuru.
“Estudante sira ne’ebé abandona tiha sira-nia eskola tanba ekonomia família la sufisiente ka tanba problema partikulár sira bele hetan fali oportunidade tuir programa kursu ekivalénsia. Bele hetan fali sira-nia direitu iha eskola formál. Ezemplu daudaun iha ona eskola ekivalénsia terseiru siklu, kuandu estudante sira ne’e akaba iha nivel refere sira bele tama ba eskola formál iha ensinu sekundáriu”, nia realsa.
Nia hatutan mós katak ba ensinu sekundáriu maka seidauk iha, tanba ne’e ministériu hakarak loke tan prosesu ida atu iha mós kursu ekivalénsia iha sekundáriu, nune’e estudante ne’ebé abandona eskola bele tuir programa refere. “Kuandu akaba iha nivel ne’e, sira bele hetan mós fatin iha ensinu superiór ka universidade ne’ebé eziste ka hetan ona akreditasaun” afirma.
Jornalista: Tomé Amado
Editora: Maria Auxiliadora
