DILI, 29 maiu 2023 (TATOLI) – Portavós Komandu Jerál PNTL, Superintendente Xefe Arnaldo Araújo, husu ba suspeitu soke vitíma IK atu koopera no labele halai lakon.
Vitíma ho inisiál IK hetan asidente tráfegu iha área Delta nian bainhira vítima ho nia kolega kondús motorizada halai liu iha fatin ne’ebá no derepente hetan soke hosi karreta ida, maibé motorista ne’ebé mak lori karreta refere laiha responsablidade tanba hafoin soke tiha vítima IK ho nia kolega motorista ne’e halai lakon tiha.
Asindente tráfegu ne’e akontese iha loron (29/5), oras 2:00 madrugada ne’ebé mak rezulta vítima IK ho nia kolega hetan kanek grave no agora daudaun vítima nain rua oras ne’e halo hela tratamentu iha Hospitál Nasionál Guidu Valaderes Díli.
“Husu ema hotuhotu liuliu motorista sira ne’ebé lori karreta ka motór soke ema husu atu responsablidade ba idak nia aktu. Hanesan kazu ne’ebé motorista karreta soke vítima nain rua iha ohin madrugada ne’e husu atu bele entrega aan atu prosesu investigasaun ne’e bele la’o lalais, tanba ema nain rua mak sofre ona kanek”, Portavós Komandu Jerál PNTL, Superintendente Xefe Arnaldo Araújo informa ba jornalista sira iha Komandu Jerál PNTL, Caicoli, segunda ne’e.
PNTL sei halo hela identifikasaun no sei buka tuir hela ema ne’e, atu motorista ne’ebé lori karreta ne’e bele responsabliza ba nia aktu.
“Kazu ba asidente tráfegu ida ne’e, parte polísia sei halo identifikasaun, tanba kazu ne’e rasik foin madrugada, ne’e mak foin akontese no ita espera katak tempu badak kazu sira ne’e ita bele hatene nian kronolojia asidente ida ne’e”, Arnaldo Araújo informa.
Iha fatin ketak Enfermeira Carla de Jesus Mendes, haktuir pasiente ho inisiál IK agora daudaun halo tratamentu iha sala internamentu cirurgia HNGV.
“Vítima nia-kondisaun ladun di’ak, tanba ne’e família presiza besik mai, tanba to’o agora vítima seidauk hetan vizita hosi nia família rasik, agora daudaun nia kolega sira mak foin mai vizita, tanba ne’e, ami husu família vítima sira tenke hakbesik mai hodi haree vítima tanba vítima nia kodisaun ladún di’ak”, Carla de Jesus haktuir.
Jornalista: Natalino Costa
Editór : Zezito Silva
