MS inagura Sentru Onkolojia iha HNGV
DILI, 30 maiu 2023 (TATOLI) – Ministériu Saúde ohin halo ona inagurasaun ba unidade onkolojia iha Hospitál Nasionál Guido Valadares (HNGV).
“Hanesan ita hotu hatene, númeru totál pasiente ne’ebé sofre moras kankru kontinua aumenta ba bebeik no númeru pasiente ne’ebé ita transfere ba rai liur tanba moras kankru, tinan kotuk aumenta liu ho moras sira seluk tanba ne’e ohin ita halo inagurasaun ba unidade onkolojia iha HNGV atu halo tratamentu ba moras kankru iha ita-nia rain”, Minsitra Saúde Odete Maria Freitas Belo, informa bainhira remata inagurasaun ba unidade onkolojia iha HNGV, ohin.
Nia dehan, nu’udar Hospitál top referrál, Ministériu Saúde iha responsabilidade bo’ot tebes hodi apoia HNGV atu kria kondisaun relativu ho rekursu rumanu, materiál no ekipamentu, inklui medikamentu no konsumíveis médikus hodi bele halo diagnóstiku ne’ebé di’ak no halo asisténsia médika ba pasiente sira ne’ebé sofre moras kankru.
“Ha’u sente orgullu tebes tanba molok ha’u termina mandatu nu’udar Ministra Saúde, ita bele inaugura fasilidade ida ne’ebé dedika espesialmente ba onkolojia iha HNGV tanba ita iha ona espesialista timoroan ne’ebé hamutuk ho espesialista husi Brigada Médica Cubana bele tau matan ba ita-nia pasiente ne’ebé presiza asisténsia médika iha área onkolojia. Ita mós kontinua buka meius hodi koopera ho fasilidade onkolojia iha rejiaun hodi hadia ita-nia kapasidade resposta ba moras ida ne’e”, nia esplika.
Hakarak fó apelu ba ita hotu atu kontinua halo esforsu hodi dezenvolve servisu onkolojia iha HNGV no mós ajuda INSP-TL iha área investigasaun no peskiza liga ho situasaun moras onkolójika iha Timor-Leste hodi bele sai evidénsia ba Ministériu Saúde atu estabelese programa nasionál ba prevensaun no kontrolu moras kankru iha Timor-Leste.
Iha fatin hanesan, Diretór Klíniku HNGV Alito Soares, hateten HNGV iha ona sentru onkolojia atu halo tratamentu ba moras kankru sira iha rai-laran.
“Ita iha ona sentru onkolojia ne’ebé liga kedas ho ita-nia kazu transferénsia ne’ebé mak durante halo tratamentu iha rai liur, entaun ita bele halo tratamentu fila fali iha rai laran atu redúz kustu sira ne’ebé mak durante iha”, Alito Soares informa.
Nia subliña, daudaun ne’e rekursu umanu sufisiente ona atu halo tratamentu moras onkolojia iha rai laran tanba médiku onkolojista iha na’in tolu brigada kuba ida, médiku jerál na’in neen, farmasista na’in tolu no enfermajen na’in tolu, atu apoiu ekipa ida ne’e hodi halao servisu iha rai laran.
Xefe Unidade Onkolojia iha HNGV, João Teodoro Amaral hateten sentru onkolojia halo ona lansamentu ho intensaun atu apoiu Ministériu Saúde hodi diminui kustu transferénsia pasiente kankru sira ba rai liur.
“Ita hotu hatene katak moras kankru durante ne’e sai preokupasaun boot ba MS, tantu HNGV tanba kustu transferénsia ne’ebé mak boot tebes entaun ohin ita halo ona lansamentu, ita hakarak halo tratamentu iha ita-nia rain rasik tanba unidade ida ne’e sei foka liubá kemoterapia ambulatória signifika pasiente sira ne’ebé mak moras kankru ne’ebé bele halo tratamentu ambulatoriamente bainhira hotu sira bele fila ba uma”, nia konklui.
Jornalista : Felicidade Ximenes
Editór : Zezito Silva
