PN preokupa 158 membru PNTL ne’ebé atu reforma

DILI, 30 maiu 2023 (TATOLI) – Prezidente Komisaun B Parlementu Nasionál (PN), trata asuntu Defeza, Seguransa no Negósiu estranjeiru, José Agostinho Sequeira Somotxo, preokupa lista membru PNTL 158 ne’ebé tama ona reforma tanba laiha despaixu.
Tuir Somotxo, lista membru PNTL ne’ebé mak Komandu PNTL aprezenta ba Governu liuhosi Ministériu Interiór ne’e la ho baze legál tanba laiha despaixu ruma ne’ebé anexa iha lista reforma hodi fó rekoñesimentu ba membru PNTL, ne’ebé atu pasa ba vida sivíl.
“Lista ne’e ita haree maihosi Ministériu Interiór, maibé lista ne’e la tuir legalidade, tanba lista ne’e, laiha despaixu”, José Agostinho, hateten ba jornalista sira iha Parlamentu Nasionál, tersa ne’e.
Somotxo esplika, tuir Estututu PNTL no lei orgánika fó dalan ba membru PNTL ne’ebé tama ona ba reforma, maibé iha lista membru PNTL nain 158 ne’ebé atu reforma la ho despaixu ida hodi anexa ho lista.
Nia husu ba Governu atu halo serimónia bo’ot molok sir aba vida sivíl.
“Ita kuandu la halo nune’e ita triste, tanba PNTL sira ne’ebé sai ne’e sira nia kontribuisaun bo’ot ba nasaun ne’e, liuliu ba seguransa, ne’ebé ha’u husu atu hanesan instituisaun PNTL, organiza serimónia ida hodi fó onra ba membru sira hanesan aktu konsiderasaun ba sira molok pasa ba reforma”, Somotxo realsa.
“Ha’u apela ba Instituisaun MI atu revé fila fali buat ne’ebé sira halo ona, hodi halo fali repúblikasaun ida ho depaixu hosi ministériu, tanba lista ne’e derepente de’it mosu no tau tiha iha Jornál Repúlika”, nia rekomenda.
Hatan kona-ba kestaun ne’e, Komandante Jerál PNTL, Komisáriu Jerál Polísia, Herique da Costa hateten, lista reforma ba membru PNTL nain 158 ne’e komandu hahú iha loron 30 fulan novembru tinan kotuk.
“Buat ne’ebé mak agora dadaun ita halao ne’e tuir hela ninian legalidade. Agora ita kontinua tanba lista naran sira ne’e, hahú kedas hatama iha loron 30 novembru 2022 no agora ita kontinua atu finaliza, karik hanesan balun sente la satisfaz ho desizaun ne’ebé mak komandu foti, bele hato’o reklamasaun”, nia dehan.
Nia dehan, lista reforma ne’e ho kedan ho despaixu hosi Komandante Jerál hodi halo púbikasaun, depois Komandu hato’o komunikasaun ba Ministériu Interiór hodi afirma katak lista reforma ne’e, komandu mak halo tuir kompeténsia komandu nian atu halo ida ne’e.
“Ita haree lista ne’e, halo públikasaun dala rua”, Komisariu Jerál PNTL ne’e informa.
Komandante Jerál Herique, hateten estatutu PNTL no lei órganika PNTL foun la fó dalan komandu halo promsaun deviza ba membru sira ne’ebé pasa ba idade reforma.
“Ida ne’e lei mak la garantia atu halo promosaun, ba postu deviza ajente ka serjentu inklui ba superintendente xefe ba deviza no komisáriu”, nia dehan.
Komisáriu adianta katak hahú loron 30 fulan-maiu, ofisiál no superiór no sub-alternus sira ne’ebé iha kargu, komandu PNTL liberta ona hosi sira nia kargu idak-idak atu sira bele komplete sira nia dokumentu prosesu sira iha MSSI hodi trata sira nia dokumentu ba reforma nian.
Jornalista: Natalino Costa
Editor : Zezito Silva

