Top

Tribunál absolve arguidu José Reis no rua seluk hosi krime fraúde fiskál

Vise-Primeiru-Ministru no Ministru Planu no Ordenamentu, José Maria dos Reis. Imajen Tatoli/Egas Cristovão

DILI, 31 maiu 2023 (TATOLI) – Tribunal Primeira Instánsia Díli deside hodi absolve arguidu José Reis, João Batista Fernandes no Bartolomeo Siqueira hosi krime fraúde fiskál tanba la komprova ho faktu ne’ebé imputa hosi Ministériu Públiku.

Iha sala julgamentu, Juiz Prosesu José Gonsalves, deklara faktu ne’ebé provadu maka hanesan empreza Sunhine Petrol Group rejista iha sistema impostu Ministériu Finansa no provadu mós empreza Sunshine Pedtrol Group faan kombustível ne’ebé presta nia atividade komersiál iha EDTL..

Iha loron 28 fulan maiu 2019 empreza Sunhine Petrol Group selebra kontratu ho Governu Timor-Leste hodi fornese mina to’o iha loron 30 fulan novembro 2019. Iha loron 10 fulan novembru tinan 2020, Governu Timor-Leste liuhosi Ministériu Finansa halo pagamentu ba kompañia refere no provadu mós kompañia refere la kumpre nia obrigasaun atu selu taxa.

Juiz Prosesu José Gonsalves deklara, provadu mós katak iha períodu tinan 2011 to’o tinan 2016 kompañia refete la ba deklara ninian obrigasaun atu selu impostu.

“Iha prosesu dilijénsia ne’ebé tribunál halo ba kazu fraúde fiskál ne’ebé envolve hosi arguidu nain tolu, hanesan arguidu José Reis, João Fernandes no Bartolomeo Siqueira la konprova katak arguidu nain tolu laos nain ba empreza Sunhine Petrol Group, maibé ema seluk mak nain ba kompañia refere”, Juiz Prosesu José Gonsalves deklara iha sala audiénsia julgamentu Tribunál Judisiál Primeira Instánsia Dili, Colmera, kuarta ne’e.

Juiz prosesu ne’e hateten, faktu provadu, iha fulan agustu kompañia refere selu pagamentu ba autoridade tributaria.

Tribunál mós deklara iha faktus ne’ebé la provadu arguidu sira hanesan sósiu ba kompañia Sunhine Petrol Group. Iha faktus la komprova katak kompañia Sunhine Petrol Group la kumpre sira-nia obrigasaun.

“Tanba ne’e, mak Tribunál haree katak la’os arguidu nain tolu maka sai hanesan sósiu ba kompania refere, maibé iha ema seluk, tanba ne’e Tribunál konsidera labele imputa krime fraúde fiskál ba arguidu nain tolu. Tribunal mós haree katak durante julgamentu ba akuzasaun sira ne’ebé akuza ba arguidu nain tolu, la provadu katak arguidu nain tolu ne’e envolve krime fraúde fiskál. Nune’e mak Tribunál deside absolve arguidu nain tolu husi krime ne’e no deklara arguidu nain tolu laiha obrigasaun atu selu impostu ka taxa ba estadu”, Juiz José Gonsalves hateten.

Hafoin le tiha desizaun Juiz Prosesu José Gonsalve mós informa katak durante prazu loron 15 parte rua mak arguidu sira la konkorda ho desizaun ne’ebé Tribunál Judisial Primeiru Instánsia foti ne’e, arguidu sira liuhosi nia defeza bele halo rekursu hasoru Tribunál nia desizaun.

“Kuandu arguidu sira no parte Defeza la kokorda desizaun ne’ebé mak Tribunál Judisiál Primeira Instánsia Díli foti, iha prazu loron 15 atu arguidu sira hatama rekursu hodi kontra desizaun ne’e”, nia afirma.

Antes ne’e iha alegasaun Ministériu Públiku husu Tribunál Judisiál Primeira Instánsia Díli atu aplika pena prizaun tinan lima ba arguidu José Reis, João Fernandes no Bartolomeo Siqueira tanba faktus komprova katak arguidu sira komete krime fraúde fiskál.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!