iklan

HEADLINE, SEGURANSA

PNTL subliña krime iha Díli hahú menus

PNTL subliña krime iha Díli hahú menus

Komandante PNTL munisípiu Dili, Superintendente Xefe Polísia Natercia Eufrasia Soares Martins. Imajen Tatoli/Francisco Sony

DILI, 01 juñu 2023 (TATOLI) – Komandante Polísia Nasonál Timor-Leste (PNTL) Munisípiu Díli, Superintendente Xefe, Natércia Eufrásia Soares Martins, rekoñese kriminalidade ne’ebé mosu baibain hahú menus ona iha Díli iha fulan maiu tinan ne’e, maske sei iha konflitu kiik ne’ebé sei iha.

“Durante fulan maiu ladún iha informasaun iha areá sira ne’ebé babain mosu krime hanesan, iha Luru-Mata, iha Marconi, iha Surikmas, iha fulan maiu nia laran ne’e menus ona, maibé ita kontinua konsidera nafatin iha ita-nia ajenda atu intensifika patrollamentu ho kareta no mós la’o ain, ba areá sira ne’ebé mak ohin temi ne’e”, Superintendente Xefe, Natércia Eufrásia Soares Martins hateten ba jornalista sira iha Caicoli, kinta, ohin.

Nia informa, maske daudaun ne’e krime boot sira hahú laiha ona maibé entre individu sei akontese iha fatin balun.

“Konflitu bo’ot laiha, maibé konfrontasaun entre individu balu sei iha, ita kontiua halo aproximasaun ho sira, ita-nia lider komunitáriu sira, lider grupu organizasaun iha fatin sira ne’ebé babain konflitu ne’e mosu, hanesan iha gan Lafaek nian, area Comoro ne’e sempre mosu konfrontu iha ne’ebá, tanba ne’e ita fó prioridade ba área sira hanesan ne’e atu ita kontinua intensifika seguransa”, Komandante Natercia hateten.

Natercia dehan, PNTL prontu atu asegura durante oras 24 nia-laran, tanba ne’e pesoál ruma ne’ebé mak hasoru asidente ruma mak subar a’an, PNTL sei buka tuir hodi ba hatan iha justisa.

Nia louva komunidade sira-nia maturidade tanba bele koopera hodi kontribui garante pás no  estabilidade iha kapitál ho objetivu Díli bele sai sidade ba pás.

“Ita-nia kapitál Díli durante ne’e, situasaun la’o hakmatek tebes, iha krime balu ne’ebé akontese maibé ne’e krime públiku, prosesu la’o normál hanesan babain, maibé problema ne’ebé mak indika iha polítika laiha, ita apresia, ita louva ita-nia líder sira, ita-nia sidadaun sira ne’ebé komprende tebes-tebes ho konsiénsia sira hatene ona katak situasaun seguransa ida estável ne’e importante ba ema hotu, atu ema labele hamate ita-nia atividade” nia dehan.

Komandante adianta, situasaun hakmatek ne’e la’os sai sasukat ba PNTL, maibé PNTL kontinua nafatin halo servisu ho responsabilidade hodi asegura ema hotu tuir dalan legál.

“Ema hotu tenke hakmatek, ida ne’e la’os hanesan buat ida ne’ebé sai orgullu ba polísia,  atu hateten polísia halo servisu ne’ebé di’ak, maibé ida ne’e mai husi ema hotu nia kontribuisaun”, nia dehan.

“Atividade vizilansia ne’e kontinua nafatin, para asegura situasaun ida ne’e atu hakmatek nafatin to’o formasaun Governu remata, to’o ita halo ita-nia atividade hanesan babain”, nia hakotu.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!