Rede Feto Timor-Leste partisipa CEDAW iha Jeneva
DILI, 01 juñu 2023 (TATOLI) – Iha 8 maiu 2023, delegasaun Timor-Leste kompostu hosi sosiedade sivil ne’ebé lidera hosi Rede Feto Timor-Leste, partisipa sesaun dala-81 hodi aprezenta relatóriu sombra/alternativu The Convention on the Elimination of All Forms of Discrimination against Women (CEDAW) ho tetun, Konvensaun Eliminasaun ba Forma Diskriminasaun Hothotu hasoru Feto ba dala-4 ba Comité CEDAW ne’ebé kompostu hosi périta Estadu membru 32.
“Desde ratifika konvensaun ida-ne’e iha 2003, Timor-Leste aprezenta ona relatóriu hamutuk haat, dahuluk iha 2008, daruak no datoluk hamutuk iha 2015 no da-haat iha 2023”, tenik iha komunikadu ne’ebé Agência TATOLI asesu, ohin.
Hanesan Estadu membru ne’ebé ratifika ona CEDAW, hakarak ka lakohi tenke halo relatóriu hodi relata progresu kada tinan haat ba Nasoens Unidas, ba kazu Comité CEDAW.
CEDAW trata kona-ba feto, Sekretaria Estadu Igualdade no Inkluzaun (SEI) mak lidera liuhosi halo koordenasaun ho liña ministerial sira hothotu hodi relata kona-ba feto nia avansu no dezenvolvimentu iha sira-nia instituisaun.
Aleinde relatóriu Estadu nian, iha mós relatóriu sombra/alternativa hosi Sosiedade Sivil no ida-seluk hosi Provedoria Direitus Umanus no Justisa (PDHJ) hanesan instituisaun independente Estadu nian.
Relatóriu sombra/alternativa nia natureza, atu sai balansu ba relatóriu Estadu nian no bainhira Estadu la halo relatóriu karik Sosiedade Sivil no PDHJ bele hato’o relatóriu refere ba Komité CEDAW hanesan relatóriu Estadu nian.
Ba periódu ida-ne’e, Relatóriu Sosiedade Sivil kontén: feto no justisa, tráfiku umanu, Violénsia bazeia ba jéneru, edukasaun, saúde, polítika, ekonomia, feto rurál, meiu ambiente, mákina Estadu ba feto nia avansu no inkluzaun sosiál hanesan asuntu transversál hodi integra iha asuntu hothotu.
Jornalista: Hortencio Sanchez
Editór : Zezito Silva
