Sentru Nasionál Reabilitasaun disponibiliza kadeira roda ho unidade 12 ba HNGV
DILI, 01 juñu 2023 (TATOLI) – Sentru Nasionaál Reabilitasaun (CNR) apoiu kadeira roda ho unidade 12 ba Hospitál Nasionál Guido Valadares (HNGV) hodi utiliza ba pasiente sira ne’ebé halo tratamentu fisioterapia no konsulta ambulantóriu nian.
“Ohin ami apoiu Hospitál Nasionál Guido Valadaraes bazeia ba pedidu ne’ebé mak diretór HNGV hato’o mai ami no ami apoiu mak hanesan kadeira roda hamutuk unidade 12 ho nia tipu oioin”, Diretora Ezekutiva Sentru Nasionál Reabilitasaun Maria Santina de Jesus dehan iha HNGV, ohin.
Nia hateten, kona-ba manutensaun ne’e iha bainhira kadeira roda ne’ebé mak hetan estragu ona iha HNGV, ida ne’e bele lori fila fali ba Sentru Nasionál Reabilitasaun atu bele halo fila fali tanba iha tékniku sira iha ne’eba prepaardu.
“Bainhira kadeira roda at ruma labele soe maibé lori fila fali ba ami-nia nia fatin hodi halo manutensaun tanba ami-nia tékniku sira aproporiadu atu hadia”, nia afirma.
Iha fatin hanesan, Diretór Klíniku HNGV, Marcelino Correia informa HNGV ohin hetan apoiu kadeira roda unidade 12, husi Sentru Nasionál Reabilitasaun atu utiliza ba pasiente sira ne’ebé halo tratamentu fisioterapia no konsulta ambulantóriu nian.
“Ita ohin simu apoiu husi Sentru Nasionál Reabilitasaun hodi utiliza iha ospitál, sei tau iha fisioterapia no ba konsulta ambulantóriu depois mós apoiu emerjénsia atu bele utiliza transfere moras iha laran no aumezmu tempu tau mós iha internamentu sira iha ospitál laran hanesan pediatria, sirurjia atu iha kazu ruma, sira presiza lori ba halo análize iha laboratóriu ka hasai raiu-x sira bele transfere liuhosi kadeira roda”, Marcelino Correia esplika.
Tanba ne’e, nia dehan kadeira roda ne’e ajuda tebes ba pasiente sira ne’ebé mak mai halo atendimentu iha HNGV liuliu ba sira ne’ebé mak fisioterapia atu treinu hanesan sira ne’ebé mak amputansi bele utiliza hodi halo atendimentu.
“Daudaun ne’e ita iha kadeira roda iha HNGV hamutuk 20 resin, husi ne’e balun ladún di’ak ona tanba pasiente sira ne’ebé mak mai halo tratamentu barak, entaun kadeira roda ne’ebé mak iha ne’e la sufisiente. Entaun ho ajuda ida ne’e ami agradese tebes ba apoiu ba ita-nia servisu hamutuk ne’e”, nia konklui.
Jornalista : Felicidade Ximenes
Editór : Zezito Silva
