DILI, 02 juñu 2023 (TATOLI) – Timor-Leste Police Development Programe (TLPDP), disponibiliza ekipamentu sistema dijitál software “Forensic Comparation ba Departementu Investigasaun Krimenál (DIK) Polisia Nasionál Timor-Leste atu halo atendimentu ba kazu krime sira ho di’ak.
“Ekipamentu Software, ida ne’e sistema dijitál komparasaun forensic, software ne’e atu deteta ba kualker kríme, saida de’it mak akontese iha terenu, karik ita-nia polísia hanesan husik hela evidénsia ruma iha terrenu, ita-nia investigasaun liuliu forensik bele utiliza ida ne’e, atu bele deskobre kona-ba suspeitu sira”, Komandante Jerál PNTL Komisáriu Jerál Polísia Herique da Costa, hateten ba jornalista sira iha Komandu Jerál PNTL, Caicoli sesta ne’e.
Nia dehan, rekursu ne’ebé mak atu jere ekipamentu ida ne’e, Komandu PNTL prepara ona ema na’in-hitu atu operasionaliza solfware ne’e iha futuru.
“Sira na’in-hitu, membru PNTL, Departamentu Investigasaun Krimenál liuhosi ninia ofisiál investigasaun ihá area forensic nian konklui ona formasaun ba ida ne’e”, Herique adianta.
Komandante Jerál PNTL, hateten ofisiál investigadór na’in-hitu ne’e durante formasaun sira fasilita hosi formadór sira Polísia Federál Austrália nian iha Timor-Leste, iha Programa Dezenvolvimentu Polísia Timor-Leste no matéria ne’ebé ofisiál investigasaun kriminál sira ne’e hetan, maka autór ka suspeitu sira ho laís.
Tuir nia, Timor-Leste iha esperiénsia, kazu krime akontese barak liu maibé autoridade polísia sira la konsege identifika suspeitu, tanba lakohi koopera ho Polísia, hodi halai lakon.
“TLPD apoiu ho ekipamentu lubuk ida, ita bele hatete katak ekipamentu ne’e sufisiente atu bele halo kna’ar ida ne’e. Na’in bá Software “Forensick Comparation Software hosi John. Ita haree buat ne’ebé maka seidauk kompleta depois Komandu Jerál bele buka, atu bele kompleta tán”, nia hateten.
Iha fatin hanesan, na’in ba Software “Forensic Comparation Software” hosi TLPDP, John Moloney hateten, Polísia Federál Austrália kompromete nafatin apoia PNTL no mantein fó formasaun ba PNTL atu hasa’e kapasidade polísia lokál ninian, iha rejiaun ne’e.
“Tanba ne’e ho téknolójia ida ne’ebé mak ami lori mai iha ne’e, téknolójia ida ne’ebé ke uza iha Austrália, inklui mós ajénsia sira seluk ne’ebé uza iha mundu ne’e. Tanba uluk ne’e, ha’u mós polísia, ne’ebé, ha’u kria software ida ne’e, bainhira ha’u sei iha polísia. Tanba ne’e maka, ha’u haksolok tebes, ha’u hakarak partilla software ida ne’e, bá polísia sira seluk, liuliu PNTL atu ajuda sira nia servisu ho di’ak liuliu atendimentu kazu”, John Moloney konklui.
Jornalista: Natalino Costa
Editór : Zezito Silva
