Top

APC hetan apoiu hosi Sentru Sivíl no Militár Austrália halo planu responde dezastre naturál

Australian Civil-Militar Center serbisu hamutuk ho Sekretáriu Estadu dezastre naturál realiza workshop hodi halo koordensaun servisu ho FFDTL no PNTL oinsá atu atende no atua bainhira akontese dezastre naturál, iha Timor Plaza, segunda (05/6/2023). Imajen Tatoli/António Daciparu

DILI, 05 juñu 2023 (TATOLI) – Autoridade Protesaun Sivíl ( sigla portugés, APC) servisu hamutuk ho Sentru Sivíl no Militár Austrália hodi tulun malu atu halo planu ba mitigasaun hodi responde bainhira akontese dezastre naturál.

Kooperasaun institusionál ne’e efetua liuhosi workshop loron-tolu ne’ebé mak Sentru Sivíl no Militár Austrália fó ba Autoridade Protesaun Sivíl.

Workshop ne’e hetan partisipasaun hosi membru FALINTIL-Forsa Defeza Timor-Leste (F-FDTL) inklui Polísia Nasionál Timor-Leste (PNTL). Tanba tuir lei seguransa nasionál hatur pilár tolu importante mak F-FDTL, PNTL no Protesaun Sivíl.

Sekretáriu Estadu Protesaun Sivíl (SEPS) Joaquim Gusmão, hateten Autoridade Protesaun Sivíl (sigla portugés, APC) servisu hamutuk  ho Sentru Sivíl no Militár Austrália realiza Workshop hodi koalia kona-ba planu militasaun ba dezastre naturál,

Nia dehan, workshop ida ne’e nudar fortalesimentu instituisionál entre Autoridade Protesaun Sivíl ho Sentru Sivíl no Militár Austrália inklui F-FDTL no Polísia. Oinsa ba oin tulun malu no bele responde ba dezastre naturál

“Ohin ne’e ita halo workshop durante loron tolu hodi bele fahe esperiénsia ba malu entre Autoridade Protesaun Sivíl ho Sentru Sivíl no Militár Austrália  hodi bele organiza di’ak liután ita-nia planu halo preparasaun hodi responde ba dezastre no mós rekooperasaun ba dezastre liuliu atu responde didiak lalais ba ita-nia komunidade ne’ebé maka afetadu ba dezastre”, Sekretáriu Estadu Protesaun Sivíl Joaquim Gusmão hateten ba jornalista sira iha Timor Plaza segunda ne’e.

Responsavél Sentru Sivíl no Militár Austrália, Suano Ikoro, hateten prontu apoia másima ba Autoridade Protensaun Sivíl liuliu ba kestaun problema dezastre natural.

“Iha workshop ne’e ami koalia liu kona-ba oinsá atu halo planu liga ba mitigasaun no rezolve problema dezastre naturál bainhira akontese dezastre”, nia dehan.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!