Gally Freitas orgullu joga iha Liga Indonézia
DILI, 05 juñu 2023 (TATOLI) – Jogadór estrela Timor-Leste Paulo Gally Freitas orgullu bainhira simu kontratu hosi klube jigante Indonézia PSS Semarang hodi joga iha Liga Indonézia durante époka ida.
“Orgullu tanba foin primeira-vez timoroan mai joga iha ne’e no sei foti nasaun timor nia-naran atu hatudu ba ema katak timor mós bele hodi hatudu talentu bola no bele kompete ho jogadór seluk”, Gally dehan ba Agência TATOLI, via media sosial WhatsApp, ohin.
Nia dehan, kontratu asina ona ho klube durasaun tinan ida, tanba ne’e sei esforsu makas atu bele hatudu performe di’ak hodi hamorin mós naran Timor-Leste nian.
Esperiénsia badak Gally iha mundu futeból
Ba jogadór fitun ne’e, dezafiu saida no oinsá de’it mak mosu tenke hasoru no simu ho hamnasa-midar, tanba ida-ne’e hanesan luta ida-ne’ebé tenke buka manán ninia an rasik liuhosi luta makas.
Atu manán dezafiu foun iha nia moris, obstákulu ne’e dezafia Paulo Gally Freitas ne’ebé foin halo idade tinan 18 ne’e tenke hasoru dezafiu foun iha nia moris.
Razaun, tanba nia hetan krítika moruk hosi nasaun lubuk no timor-oan balun hodi dun-matak katak nia falsifika tinan-moris iha jogu internasionál Asian Football Federation (AFF) U-15 foin lalais ne’e iha Tailandia.
Maibé, ba jogadór ne’ebé moris iha 31 dezembru 2004 ne’e, la hatudu oin tauk hasoru krítika maibé hetok nia simu-hasoru ho ho oin-midar no hakmatek hodi hasoru presaun hirak-ne’e.
Gally sai sentru atensaun ba adversáriu sira tanba nia iha esesu nu’udar jogadór avansadu ne’ebé badinas kaer bola no matenek kedok bola hodi hatama golu, liuhosi hatudu ninia asesu iha jogu AFF ne’ebé nia eleitu sai mellór markadór ho golu lima iha jogu refere.
Ninia fíziku atlétiku, isin mutin no ain aas. Tanba ne’e, sé matan fihir sala, ema bele haree sala dehan nia la’ós moris iha tinan 2004, maske liuhosi rezulatdu teste médiku iha Sentru Saúde AFF no AFC nian la hatudu faktu katak nia falsifika nia tinan moris.
Estudante Ensinu Sekundáriu Katóliku Kristal ne’ebé hahú nia karreira futeból iha Sentru Juvenil FFTL iha tinan 2011 ne’e hateten, ba oin, mantein nia pozisaun hodi hatudu jogu ne’ebé di’ak liután, nune’e bele lori Timor-Leste nia-naran morin iha mundu liuhosi mundu futeból.
Liafuan “Aifuan monu la dook hosi nia hún” ne’e merese hanesan karimbu ida prega ba oan hosi João da Costa Freitas no Ana Maria Martins Nascimento, tanba fatór jenétiku hosi nia inan ne’ebé uluk hanesan jogadora ida, lori Gally daudaun hanesan jogadór estrela iha Timor-Leste.
“Ha’u-nia pai uluk sei ki’ik la mete futeból. Só ha’u-nia maen de’it mak halimar bola. Tanba ne’e, ha’u tuir ha’u-nia maen nia ain-fatin,” Oan dalimak hosi maun-alin na’in-neen (6) ne’ebé oras ne’e sai jogadór avansadu prinsipál iha klube PSS Semarang ho ne’e ho oin midar.
Antes atu ba joga iha PSS Gally joga iha klube Timor-Leste nian Karketu Dili FC iha époka 2023 konsege lori ekipa kapital Dili ne’e sai kampiaun ba liga.
Ho performe brillante ne’e mak atrai tebes klube Indonézia nia laran hodi fó kedan kontratu ba jogadór timoroan ne’e.
Alende ne’e Gally mós joga hamutuk ho klube jigante Timor-Leste AD SLB Laulara no Lalenok United FC iha tinan sira ba kotuk.
Jornalista: Hortencio Sanchez
Editór : Zezito Silva
