DILI, 05 juñu 2023 (TATOLI) – Segundu Komandante Jerál Polísia Nasionál Timor-Leste (PNTL), Komisáriu Polísia Pedro Belo, hateten PNTL la tolera kualker individu ne’ebé tenta kontribui instabilidade nasionál.
Pedro Belo hato’o posizaun ne’e hodi hatan ba deklarasaun atuál Deputadu Bankada Fretilin José Agostinho Siqueira ‘Somoxto’ ne’ebé hateten iha rede sosiál facebook katak prontu fakar ran tanba Fretilin sei mobiliza masa hosi munisípiu sira atu halo asaun pasífika hodi husu demisaun ba lider Prezidente Partidu Fretilin Francisco Guterres Lú-Olo no Sekretáriu Jerál Fretilin Mari Alkatiri hodi rejigna aan hosi posizaun.
“Ita-nia ema balun fó sai iha media sosiál ho liafuan kroat tebes hanesan ema hotu preokupa no parte seguransa mós preokupa, tanba ne’e, PNTL sei la tolera kualker aktu krime ne’ebé sei mosu mai no la tolera ba ema sira ne’ebé hakarak hatún masa mai iha Dili sem iha koñesementu hosi PNTL”, Komisáriu Polísia Pedro Belo, hateten ba jornalista sira iha Kuartel Jerál PNTL Caikoli, segunda, ohin.
Nia husu ba ema hotu liuliu lider polítiku sira atu hakmatek iha idak idak nia fatin hodi kontribui ba pás no estabilidade.
“Atu aviza ba ema hotu katak iha diferénsia opiniaun iha organizasaun ka partidu polítiku. Ami husu ba aman no maun sira buka malu atu rezolve ho ulun malirin, labele lori povu no militante hodi ameansa malu, tanba ita hotu lakohi atu situasaun balun akontese tán fila fali hanesan uluk buat ne’ebé akontese iha pasadu, ita husik liu ona ba”, Pedro Belo hateten.
Nia dehan, kualkér se de’t mak atu halo konsentrasaun ema ou massa mai iha Díli tenke iha lisensa ou iha koñeementu ka tuir lei manifestasaun hanesan fó uluk koñesementu ba parte seguransa .
“Ami PNTL husu kualker se de’it mak hakarak estraga instabilidade ida ne’e Polisia Nasionál Timor-Leste sei laiha toleransia ba aktu sira ne’e, PNTL sei garantia seguransa ba komunidade, husu mós ba povu tomak labele konsumu informasaun ne’ebé mak ema balun fó sai atu organiza atu tún mai Díli, bainhira tama mai Dili ita sei akompaña no tenke mai hasoru ho seguransa, tanba ne’e ami parte seguransa”, Komisáriu PNTL Pedro Belo fó-hanoin.
Nia husu atu lider partidu sira ka’er liman hamutuk oinsa povu Timor-Leste moris ho hakmetek hodi halo dezenvolvimentu, la’os kria fali instabilidade iha rai laran, tanba ne’e lori PNTL nia naran sei la tolera ba aktus krime ne’ebé mak sei mosu iha kapital.
“Bainhira sira la rona, ami sei uza forsa. PNTL prontu ona atu responde kualkér asaun ne’ebé mak mosu mai, PNTL hakarak tur hamutuk hodi rezolve ho sira nia matenek ho ulun malirin, tanba povu lakohi atu terus tán”, nia konklui.
Jornalista: Natalino Costa
Editór : Zezito Silva
