STAE Baucau kontinua prepara hasoru eleisaun suku
BAUCAU, 05 juñu 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau kontinua prepara-aan hasoru eleisaun suku iha tinan-ne’e.
Diretór STAE Munisípiu Baucau, Natividade Freitas Guterres, esplika, eleitór suku antes ne’e realiza hosi Autoridade Administrasaun Munisipál nune’e bainhira realiza STAE Baucau prontu apoia hodi fó susesu ba prosesu demokrasia iha kada suku.
“Ita sempre iha planu ba preparasaun prosesu eleisaun suku ne’ebé tuir informasaun sei realiza iha fim tinan-ne’e,” Diretór STAE Baucau hateten iha Vila Nova, segunda ne’e.
STAE rasik liuhosi reuniaun avaliasaun iha nasionál simu ona informasaun atu kontinua prepara-aan hasoru eleisaun suku maibé atuál sei iha faze ámbitu eleisaun parlamentár ne’ebé rezultadu finál sei fó sai hosi Tribunál Rekursu.
Eleisaun suku rasik realiza ba dala-rua ona hanesan tinan-2009 sistema pakote ne’ebé organiza hosi STAE no tinan-2012 sistema kandidatu individu ne’ebé organiza hosi Administrasaun Munisipál no STAE fó apoia.
“Bainhira utiliza lei eleisaun suku tinan-2012 nian entaun ami apoia tékniku de’it,” Natividade Guterres akresenta.
Hosi sistema eleisaun suku rua refere parte STAE sempre fó apoia tanba nu’udar órgaun eleitorál ne’ebé eziste iha Timor-Leste.
Munisípiu Baucau iha postu admistrativu neen hanesan; Baguia, Baucau Vila, Laga, Quelicai, Venilale no Vemasse ho totál suku atúal 59 no sei aumentu suku foun rua nune’e bainhira realiza eleisaun suku sei hili xefe suku hamutuk 61.
Jornalista : Natalino Belo
Editór : Evaristo Soares Martins
