iklan

HEADLINE, SAÚDE

ICU Movél iha HNGV seidauk funsiona

ICU Movél iha HNGV seidauk funsiona

Diretór Klínika Hospitál Nasionál Guido Valadares (HNGV), Marcelino Correia, imajen TATOLI/ Felicidade Ximenes.

DILI, 06 juñu (TATOLI) – Diretór Klíniku iha Hospitál Nasionál Guido Valadares (HNGV), Marcelino Correia, afirma ICU Movél ne’ebé mak iha HNGV, profisionál saúde sira seidauk uza tanba seidauk instala osijéniu.

“Atu esklarese ba públiku katak ICU movél ne’ebé mak ita simu husi povu Amerikanu liuhosi Ministériu Saúde agora iha hela HNGV ne’e, ami la uza tanba seidauk instala osijéniu”, Marcelino Correia hateten ba jornalista sira iha nia fatin HNGV, ohin.

Nia rekorda, Icu Movél ne’ebé povu Amerikanu apoiu ba Governu Timor-Leste ne’e momentu atu utiliza ba iha pandemia covid-19 nian, maibé moras covid-19 la iha ona bele uza ba moras grave sira maibé to’o agora seidauk utiliza.

“ICU movél ne’e halo ona handover mai iha HNGV, iha handover ne’e’ iha kama 10 atu utiliza ba pasiente ne’ebé mak ho moras presiza atu atende emerjénsia”, nia esplika.

Nia relata, to’o agora ICU movél ne’e seidauk utiliza tanba instalasaun osijéniu sentrál seidauk iha, aumesmu tempu ho rekursu ne’ebé mak sei limitadu hela, tanba enfermeiru sira ne’ebé mak atu prepara hodi apoiu iha ICU movél ne’e seidauk sufisiente, entaun agora seidauk bele halo rekrutamentu tanba Komisaun Funsaun Públika la fó dalan atu halo rekrutamentu, ne’ebé hein fali Governu dasia mai mak foin halo rekrutamentu ba ida ne’e.

“ICU movél ne’ebé iha balun seidauk kompletu, instalasaun sira hanesan osijéniu sentrál atu utiliza ba pasiente sira ne’ebé mak atu baixa, aumesmu tempu utilizasaun ne’e atu responde ba kazu urjente, ne’ebé mak mai baixa iha HNGV, iha situasaun ida ne’e Konsellu Diretivu prepara hela rekursu tanba ita mós limitasaun ba iha rekursu, ne’ebé mak durante ne’e ita prepara atu apoiu servisu ba iha ICU movél ida ne’e”, nia hateten.

Nia dehan, HNGV iha departamentu kuidadu intesivu iha kama neen, ida ne’e la sufisiente, atu responde ba pasiente sira ne’ebé baixa iha ICU.

“Ita hanoin katak ICU movél ne’e estende espesífiku ba sira ne’ebé moras iha ICU nian, hodi nune’e ajuda ventiladór osijéniu”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!