DILI, 06 juñu 2023 (TATOLI) – Organizasaun Naun-Governamentál Mary Mackilop Today (MMT) disponibiliza formasaun ba profesór hamutuk 578 iha Ermera, Manufahi no Liquiçá.
Diretór-Ezekutivu MMT, Alípio Baltazar, hatete organizasaun ne’e halo serbisu tuir responsabilidade ne’ebé maka Ministériu Edukasaun fó. “Serbisu ne’ebé sira atinje ona maka formasaun espesífika ba manorin sira iha eskola 72 hodi aumenta koñesimentu ida adekuadu atubele implementa fali programa sira ne’e ba estudante 12.838 iha munisípiu tolu ne’e”, Alípio Baltazar hatete, ohin, iha ámbitu asina akordu entre Ministériu Edukasaun, Juventude no Desportu (MEJD) no Ministériu Saúde (MS) no MMT, iha Vila Verde.
“Formasaun ne’ebé ita konsege realiza ona durante tinan tolu ba profesór hamutuk 578 husi eskola 72 ne’e mak hanesan literasia tetun, literasia saúde no implementasaun sentru aprendizajen movel no distribuisaun livru ba alunu no komunidade sira”, dehan.
Nia haktuir formasaun sira ne’ebé maka realiza ona ne’e hetan akompañamentu husi Ministériu Edukasaun no INFORDEPE, nomós Ministériu Saúde, nune’e bele haree direta implementasaun programa ba eskola 72 ne’e ninia benefísiu ba duni estudante sira iha munisipiu refere.
Programa ne’e nia implementasaun bazeia ba akordu ne’ebé realiza ona entre MEJD, MS no MMT iha tinan hirak liu-bá kotuk. Programa ne’e aleinde foka ba edukasaun, enkaixa mós matéria saúde sira atubele kapasita manorin no estudante sira iha pré-eskolár no eskola bázika bele kuidadu mós sira-nia saúde.
Alípio Baltazar afirma mós katak aleinde iha sentru aprendizajen móvel, iha mós apoia livru rihun 22.463. Livru ne’e sobre moris saudavel ne’ebé konsege distribui ona ba eskola no komunidade sira, nune’e bele sai referénsia ida ba sira atu komprende kona-ba kuidadu saúde ida ho di’ak no loloos.
Husi programa tinan tolu ne’e, Mary Mackilop mós konsege konstroi ona hariis-fatin 37, lixeiru 38 iha eskola sira hodi fasilita alunu sira soe fo’er tuir nia fatin, nune’e bele kuidadu ambiente ida saudavel iha eskola 72 ne’e.
Ba programa refere, Mary Mackilop, Ministériu Edukasaun no Ministériu Saúde asina tan akordu ba estensaun programa edukativu no saúde, liuhusi projetu literasia saúde hodi disponibilizia formasaun bazeia ba konteúdu kurríkulu tuir polítika no padraun MS no MEJD nian ba manorin sira iha eskola bázika ne’ebé sei implementa programa iha Ataúro Liquiçá Ermera no Manatuto ba períodu tinan lima.
Objetivu husi estensaun akordu entre parte tolu atu promove saúde edukativa ne’ebé di’ak liu ba labarik sira. Konteúdu formasaun ne’e maka foka ba sistema isin-lolon (sistema dijestivu, muskulár no eskelétiku), moras hada’et (malária no denge, tuberkuloza, infesaun respiratória aguda no seluk tan, moras la hada’et (fuma sigarru no droga), primeiru sokorru, jestaun lixu eskolár no seluk tan.
Jornalista: Tomé Amado
Editora: Maria Auxiliadora
