FFTL halo mudansa ba jogadór U-23 prepara ba kompetisaun AFF-AFC
DILI, 07 juñu 2023 (TATOLI) – Adjuntu Sekretáriu Jerál Federasaun Futeból Timor-Leste (FFTL) Frederico Martins, informa federasaun liuhosi treinadór foun hosi Korea Súl deside halo mudansa ba jogadór U-23 ne’ebé prepara ba kompetisaun ASEAN Football Federation (AFF) no Asian Football Confederation (AFC) ne’ebé sei akontese tinan ne’e.
“Ita iha treinadór ida hosi Korea nian, iha ideia ida ita konsidera furak tebes depois rezultadu hosi SEA Games foin lalais, nota katak FFTL dependénsia ba jogadór sira ne’ebé durante ne’e tama ona iha selesaun nasionál, entaun nia rekomenda mai ami atu halo enkontru ho klube hotu iha Liga Futeból Timor-Leste(LFTL) atu rekomenda jogadór kada klube ema na’in lima hodi halo selesaun to’o ikus iha duni rezultadu di’ak, hetan duni jogadór di’ak balun”, Frederico dehan ba Agência TATOLI iha edifísiu FFTL, kuarta ne’e.
Nia dehan, la’os de’it halo selesaun hosi jogadór sira hosi klube 17 ne’ebé hamahan aan iha LFTL maibé envolve mós jogadór balun hosi munisípiu hanesan Baucau, Covalima no Ermera.
“Prosesu selesaun ida ne’e supreza tebes, tanba jogadór sira durante ne’e iha selesaun nasionál liuliu balu ne’ebé selesionadu ba SEA Games naran la tama iha lista ka la pasa selesaun, iha lista selesaun ne’e jogadór foun 50% jogadór tuan 50%, ida ne’e mudansa signifikativu tebes ba ita nia futeból”, nia dehan.
Prosesu selesaun ba jogadór sira hala’o durante semana ida no termina iha sesta semana kotuk.
Iha lista primeiru jogadór hamutuk 100-resin mak tuir selesaun maibé to’o selesaun ikus jogadór hamutuk na’in 26 mak tama iha lista fiksu ne’ebé prepara ba eventu internasionál rua ne’ebé sei hala’o tinan ne’e.
Tuir oráriu ne’ebé fó sai ona, jogu AFF sei hala’o 01-19 agostu mai ne’e iha nasaun Thailandia no Timor-Leste sei kontra nasaun Indonézia no Malazia.
Aleinde ne’e jogu kualifikasaun ba AFC tinan 2024 nian sei hala’o fulan setembru iha Kwait no Timor-Leste sei kontra Kwait rasik no Iran.
Ho mudansa jogadór ne’ebé iha, FFTL fiar katak sei hatudu rezultadu signifikativu iha jogu sira hotu tanba FFTL fiar iha prosesu tanba treinadór foun ne’ebé ho métodu ne’ebé brilante tebes.
Jornalista: Hortencio Sanchez
Editór : Zezito Silva
