SEJD atribui sertifikadu apresiasaun ba media nain no jornalista destakadu
DILI, 09 juñu 2023 (TATOLI) – Governu liuhosi Sekretáriu Estadu Juventude no Desportu (SEJD) atribui sertifikadu apresiasaun nain ba media no jornalista sira ne’ebé durante ne’e destaka iha SEJD.
“Sertifikadu ne’ebé fó ba nain ba media sira hanesan agradesimentu ida ba sira tanba durante ne’e fó ona sira nia jornalista mai destaka iha SEJD no halo kobertura, nune’e agradese mós ba jornalista sira ne’ebé durante ne’e halo kobertura ba atividade SEJD durante ha’u nia mandatu”, SEJD Abrão Saldanha dehan ba jornalista-sira iha Lecidere, sesta ne’e.
Nia dezeju ba jornalista hotu ne’ebé durante destaka iha SEJD atu susesu nafatin iha kareira nian hodi fó nafatin informasaun ba públiku.
“Jornalista nia papél importante tebes iha dezenvolvimentu nasionál”, Abrão dehan.
Aleinde ne’e, nia husu ba media na’in sira bainhira atu dezenvolve desportu iha Timor-Leste presiza kooperasaun di’ak entre Governu no media.
“Ha’u-nia mensajen ba maluk jornalista sira no media na’in sira, atu promove ita-nia atleta sira, promove juventude sira ita-nia hanoin iha parte rua hotu, di’ak liu mak bombardia públiku ho kapasiade no kreatividade oioin ne’ebé mak foin sae sira iha”, nia hatutan.
Abrão husu ba jornalista sira atu muda ema nia presepsaun ho ema nia hanoin ba pozitivu atu nasaun ne’e bele moris ho pozitivu.
Media na’in no jornalista ne’ebé simu sertifikadu ne’e mak Agência TATOLI, Radio Telivizão de Timor-Leste Empresa Pública (RTTL, EP), TVE, Naunil Media, Timor Post, Neon metin, Dili Post no seluk tan.
Totál media na’in ne’ebé simu sertifikadu hamutuk 18 no Jornalista 42 ho nune’e SEJD atribui sertifikdu hamutuk 60.
Jornalista: Hortencio Sanchez
Editór : Zezito Silva
