Top

PCIC sei loke prosesu hasoru membru envolve agresaun fízika ba membru PNTL

Logotipu PCIC. Imajen/espesiál

DILI, 09 juñu 2023 (TATOLI) – Adjuntu Diretór Polísia Sientífika Investigasaun Kriminál (PCIC, sigla portugés), Adino Nunes Cabral, sei loke prosesu investigasaun ba membru PCIC ne’ebé envolve ba kazu agresaun fízika hasoru membru PNTL foin lalais ne’e

“Dezentedimentu ne’ebé mak mosu hanesan ita bo’ot sira hatene iha loron hirak liubá, ida ne’e iha ninian tramita rasik. Sé indikasaun ba krime prosedimentu tenke lao, vítima ne’ebé sente ofendidu ninian prosedimentu la’o tuir ida ne’e”, Adino Nunes Cabral hateten ba jornalista sira hafoin hasoru malu ho Komandante Jerál  PNTL no Segundu Komandante Jerál PNTL iha Kuartel Jerál PNTL Caicoli, sesta ne’e.

Adino simu ona informasaun hosi membru PCIC ne’ebé halo agresaun fízika ba membru PNTL ne’e katak kazu ne’e partikulár no la kahur ho instituisaun.

“Membru PCIC ne’e konta kazu katak kazu ne’e kahur ho interese instituisaun Estadu nian, ne’e problema partikulár, maibé kuandu iha sirkustánsia mak iha indikasaun ruma ne’ebé mak ligadu ho interese institusaun Estadu nian, instituisaun sei haree ida ne’e atu bele halo averiguasaun ikus mai bele deskobre ba ho los, mas ida ne’e ha’u lakohi atu fó hatene ba imi, nudar sidadaun iha nian regra. Por enkuantu ha’u hanoin ita sei haree ninia sirkustánsia oinsa bele ba oin halo aproximasaun averiguasaun polisiál atu bele hatene kazu ne’e ninia verasidade”, Adino dehan.

Nia esplika, vítima iha direitu tomak, tuir norma prosesuál, penál, bele halo keixa iha departementu investigasaun kriminál ka Ministériu Públiku.

Maske nune’e, kooperasaun institusionál entre PCIC no PNTL tenke funsiona iha nivel superiór, problema ne’e bele akontese iha kualker maibé superiór rua instituisaun nian tenke hamutuk, tanba ne’e hotuhotu aparellu Estadu hotu, oinsa bele garante kooperasaun iha instituisaun rua ne’e.

“Problema ne’e e problema partikulár, ita labele kahur interese partikulár nian ho interese Estadu nian. Estadu funsiona tuir nian regra, iha individu ka onkum balun ne’ebe keta iha dezentedimentu pois rezolve tuir prosesu ne’ebe iha. Ita sei loke prosesu to’o iha ne’ebá”, Adino adianta.

Tanba ne’e, nia husu ba membru PCIC hodi halao nafatin kna’ar tuir lei haruka, dezentedimentu ne’e sempre akontese iha ne’ebe de’it, laiha ema ida ne’ebé laiha dezentedimentu, dalaruma diferensia opinaiun, mutiplikasaun ne’ebé mak dalaruma ba fali iha interese seluk.

“Ajente autoridade polísia, membru sira, sidadaun baibain, iha família iha problema partikulár ruma karik iha ne’ebé, ita labele kahur mai fali iha interese instituisaun. Tenke hanoin katak interese Estadu nian tenke tau ketak”, nia fó-hanoin.

Iha fatin hanesan, Segundu Komandante PNTL, Komisariu Pedro Pedro Belo, hateten Adjuntu Diretor  PCIC ho nia Asesór Juridiku komprimeta Komandante Jerál no Segundu Komandante Jerál iha nia mandatu no koalia mós ligadu hanesan kazu horseik madrugada ne’ebé maka envolve iha oknum institituisaun rua ne’ebé mak akontese no ikus mai públiku foti kestaun ida.

“Labele kahur sasan sira ne’e hamutuk ida ne’e hanesan instituisaun Estadu nian ne’ebé mak presiza tenke kooperasaun tanba hotuhotu mak iha interese ba povu nian, tantu hosi Polísia Nasionál Timor-Leste, ita hotu hakarak kombate ba kriminál ne’ebé gosta atu estraga estabilidade iha ita nian rai laran”, nia dehan.

“Tanba ne’e maka ami lakohi buat sira ne’e la’o, tanba ne’e mak ohin dadersan hosi Komandante Jerál Adjuntu PCIC kontatu malu no ohin loraik ida ne’e, ami hasoru malu atu bele koalia ba malu kualker kazu ne’ebé mak mosu entre membru hosi PNTL ka membru hosi PCIC nian, karik mosu ami tenke liga ba malu telefone ba malu, hasoru malu, para koalia ba malu, labele se kotuk ba malu, karik ita se kotuk ba malu, mak ita rasik mak problema, hakarak halo problema ne’e sai boot ba bebeik”, Pedro Belo afima.

Tanba hotu- hotu akompana midia katak membru ne’ebé maka sai vítima ba kazu agresaun fízika ne’e momentu ne’e halo hela funsaun.

“Ida ne’e maka ohin ami hasoru malu koalia ida no ha’u fiar katak ami-nia hasoru malu ne’e servisu ne’e bele besik malu tán atu ita bele kordena malu servisu atu labele iha tan dezentedimentu”, nia afirma.

Hatán tanba sá maka momentu ne’e PNTL la detein suspeitu JK, Komisáriu Polisia ne’e hateten, PNTL momentu la konsege halo detensaun ba suspeitu JK ne’ebé halo agresaun fízika hasoru membru PNTL ne’e, tanba laos iha fragante delitu.

Kazu ne’e akontese  kinta (8/6) tuku 5:00 madrugada iha areadores Hotel HK ne’ebe lokaliza iha área Hudi-Laran, Suku Bairo Pite, Postu-Administrativu Dom Aleixo, Munisipiu Díli.

Jornalista: Natalino Costa 

Editór : Zezito Silva

Publisidade

Leave a Reply

Latest Post

error: Content is protected !!