Traballadór timoroan 55 ohin aranka ba Korea Súl
DILI, 11 juñu 2023 (TATOLI)—Sekretária Estadu Formasaun no Profisionál (SEFOPE), liuhosi Dirasaun Nasionál Empregu Exteriór (DNEE), domingu ne’e, despede tan traballdór timoroan na’in-55 aranka ba Korea Súl hodi servisu iha área peska nian.
Diretór Dirasaun Nasional Empregu no Exteriór (DNEE), Filomeno Soares, husu traballdór sira ne’ebé ba Korea Súl batu bele servisu ho didi’ak, respeita ema-nia kultura no labele sees-aan hosi Sistema servisu.
“Ha’u husu traballdór 55 ne’ebé ohin aranka ba Korea Súl, imi tenke agradese ba oportunidade ne’ebé imi hetan ne’e ba servisu ho dixiplina liu-liu labele sees hosi Sistema servisu, nune’e empregadór sira kontinua foti imi-nia maluk sira-ne’ebé daudaun ne’e, hein hela oportunidade atu ba,” Filomeno Soares hateten ba traballadór sira iha serimómoa despedida iha aeroportu Internasionál Nicolao Lobato, Comoro.
Aleinde ne’e, nia mós apela ba traballdór sira katak ba servisu apreende didi’ak manán ema-nia esperiénsia, nunne’e bainhira kontratu hotu fila-fali mai hodi dezenvolve fali nasaun Timor-Leste ba oin.
“Ita-nia rai iha tasi ne’ebé luan ho rikusoin barak maibé seidauk iha rekursu umanu ne’ebé matenek jere ikan sira-ne’e mai faan iha merkadu, nune’e imi ba servisu iha peska nian ne’e aproveita didi’ak esperésnia sira-ne’e, mai investe fali iha ita-nia rain,” nia dehan.
Iha fatin hanesan, reprezentante traballadór na’in-550 ne’e, Advento Joni da Costa, hateten nia parte sente kontente ba oportunidade ne’ebé nia hetan ba servisu iha Korea Súl.
“Nu’udar timoroan sente kontente no agradese ba Governu tanba bele fasilita ami ba servisu iha Korea Súl hodi sustenta moris família nian, no ha’u sei respeita regulamentu sira-ne’ebé iha liu-liu oinsá labele soes hosi Sistema servisu nian,” nia hateten.
Tuir dadus, traballdór ne’ebé tinan ne’e hetan ona oportunidade ba servisu iha Korea Súl hahú hosi 2009 to’o mai 2023 hamutuk 5.457.
Jornalista : Arminda Fonseca
Editór : Cancio Ximenes
