Eskola 70% mak hetan ona fundu konsesaun eskolár
DILI, 12 juñu 2023 (TATOLI) – Ministériu Edukasaun, Juventude no Desportu (MEJD) transfere ona osan ba eskola besik 800, equivalente 70%, husi totál 1.158 ne’ebé submete ona sira-nia proposta bazeia ba númeru estudante ne’ebé iha kada eskola.
Diretór-Jerál Administrasaun no Finansa, Antoninho Pires, dehan Ministériu Edukasaun prevee $25.196.200 ba konsesaun eskolár.
“Sei falta eskola 30% mak seidauk hetan sira-nia direitu, tanba to’o agora seidauk submete proposta mai Ministériu Edukasaun”, dirijente ne’e hatete ba Tatoli, iha Vila Verde, ohin.
Nia salienta atu hetan fundu konsesaun eskolár, depende ba proposta kada eskola no daudaun ne’e estudante ida hetan $2 husi konsensaun refere.
Ministériu Edukasaun rejista totál estudante iha territóriu husi ensinu báziku to’o sekundáriu jerál no tékniku-vokasionál ne’e hamutuk 125.98.
Kada tinan MEJD prevee verba ne’e ho intensaun atu apoia atividade eskola nian durante tinan ida nia laran. Osan sira ne’e eskola uza ba nesesidade urjente hanesan halo kópia no sosa sura-tahan ka tinta ba komputadór. Eskola mós bele uza ba nesesidade urjente seluk hanesan sosa bee ba hariis-fatin ka hadi’a ekipamentu eskola ne’ebé estraga no gastu ne’e labele liu $500.
“Osan konsesaun eskolár ne’e ita transfere ba eskola sira ne’e ho ninia durasaun tempu fulan 11, maibé verba ne’e tenke uza duni ba nesesidade eskola nian ne’ebé presiza no urjente. Osan ne’e ita transfere ba eskola nia konta bankária depende ba númeru estudante”, afirma.
Jornalista: Tomé Amado
Editora: Maria Auxilidora
