Médiku kardiolojista seidauk sufisiente iha HNGV
DILI, 12 juñu 2023 (TATOLI) – Diretór Klíniku iha Hospitál Nasionál Guido Valadares (HNGV) Marcelino Correia, informa, médiku kardiolojista ba daudaun ne’e seidauk sufisiente hodi halo atendimentu ba pasiente sira.
“Ita-nia médiku kardiolojista hamutuk na’in-lima, husi ne’e timoroan na’in-tolu no apoia husi médiku Xineza na’in-ida no kubanu na’in-ida”, Marcelino Correia, dehan iha nia kna’ar fatin HNGV, ohin.
Nia afirma, médiku kardiolojista iha HNGV seidauk sufisiente atu fó atendimentu ba pasiente moras fuan iha sentru kardiaku Lahane.
“Ha’u hanoin kona-ba númeru rekursu umanu ne’e, seidauk sufisiente atu bele utiliza, tanba ne’e maka ita hanoin atu haruka nafatin médiku sira ba eskola iha rai-liur, entaun fulan kotuk liubá haruka ona balun ba kuba hodi kontinua eskola ba kardiliojia nian”. nia esplika.
Nia informa, HNGV iha lista rezerva ba profisionál saúde na’in-hitu, atu ba kontinua estuda kardiologu, nune’e iha futuru bele fó atendementu ne’ebe di’ak ba pasiente sira ho moras fuan.
“Aumezmu tempu sira na’in-hitu mak agora ne’e iha hela lista rezerva nian atu bele kontinua ba eskola kardiolojista, ne’ebe sira ne’e halo estajiadu iha ne’e, aprende no agora dadaun timoroan ida iha Xina, kursu atu remata ba kardiolojia, ho sira ne’e mak foin ita bele prepara, oinsá ita-nia rekursu atu mobiliza ba iha sentru Lahane”, nia revela.
Nia hatutan, planu ba sira na’in-hitu ne’ebé ba estudu kardiolojia iha rai liur ne’e husi Ministériu Saúde, hodi ba kontinua estudu iha Kuba, sira ne’e iha lista rezerva hein kuandu prosesu los ona, orsamentu los ona sira bele ba kontinua estudu iha ne’eba.
“Rekursu umanu ne’e la’os ba de’it iha sentru Lahane, maibé tenke tau mós rekursu ba kardiolojista iha HNGV, atu bele apoia servisu kardiolojia nian, atu tempu sentru kardiologia iha lahane nafatin halo nia funsaun”, nia konklui
Jornalista : Felicidade Ximenes
Editór : Zezito Silva
