Top

Janeiru-maiu PNTL rejista óbitu 28

Logo PNTL (Foto/spesial)

DILI, 12 juñu 2023 (TATOLI) – Xefe Departementu Tránzitu Seguransa Rodaviária Nasionál Komandu Jerál Polísia Nasionál Timor-Leste (PNTL), Superintendente Polísia, António da Luz, relata hahú hosi fulan janeiru to’o maiu, PNTL rejista ema ne’ebé mak lakon vida hamutuk 28 tanba asidente viasaun.

“Durante fulan janeiru to’o 31 maiu, ita rejista kazu asidente kanek kaman hamutuk 1.016, kanek todan hamutuk 161, rejistu ema mate iha asidente viasaun hamutuk 28”, António da Luz, hateten ba jornalista sira iha Komandu Jerál Caicoli, segunda ne’e.

Nia dehan, hosi asidente hirak ne’e, iha 23 mak prosesa ona ba Tribunál. Iha kazu hamutuk 3.031 mak iha hela prosesu hodi enkamiña ba Ministériu Públiku no rezolve liuhosi família iha 3066.

António esplika númeru ba kazu asidente hirak ne’e iha mai hosi fatór 90% kontribui ba asidente liuliu la kontrola aan bainhira iha kondisaun lanu, dalaruma seidauk hatene lori motór entaun hakarak lori to’o kontribui ba desastre, la kontrola karreta nian kodisaun no motór no iha munisípiu kuaze dalan balun kodisaun aat no ikus liu mak natureza.

“Ami sempre halo halo avizu no sosializasaun hodi fó hanoin bebeik ba ita-nia motorista sira,  tantu sira ne’ebé kondúz motór no karreta, ita fó hanoin bebeik ba sira atu sira bele kuidadu sira ninia pesoál bainhira kondúz motór no karreta”, nia esplika.

Komandante akresenta, la’os fó hanoin ba motorista sira liuhosi avizu, maibé iha tinan rua ba kotuk hosi Departementu Tránzitu no Seguransa Rodaviáriu hamutuk ho Polísiamentu Komunitáriu no DNTT halo edukasaun sívika iha eskola sira iha Díli hodi sosializa ba estudante sira kuandu lori motór no karreta tenke ho kuidadu.

“Meius di’ak liu mak redúz númeru asidente tráfegu mak edukasaun sivika.Ita bo’ot sira akompaña iha tinan hirak liuba liuhosi ami tama sai eskola fó formasaun ba estudante sira hodi fó hanoin bainhira kondúz motór no karreta iha dalan públiku tenke ho kuidadu no ami mós  fasilita sira hodi hasai tán karta kodusaun”, nia dehan.

Nia relembra, hahú hosi fulan janeiru to’o maiu, PNTL hatama reseita ba konfre Estadu hamutuk $ tihun atus tolu sanunu resin rua, atus ida tolu nolu resin tolu.

Fonte reseita sira ne’e mai hosi infratór sira ne’ebe mak selu koima liga ho infrasaun ne’ebé sira rasik komete hanesan kondúz motór la uza kapasete, espellu laiha, xapa matríkula laiha inklui laiha karta kondusaun.

“Hosi munisípiu sira ne’ebé mak ita rekolla reseita barak liu ne’e PNTL Munisípiu Díli, hamutuk rihun atus ida, hitu nolu resin neen, atus sia rua nolu resin rua”, nia informa.

Aleinde ne’e, nia reforsa katak PNTL mós halibur reseita Estadu hahú hosi fulan janeiru to’o fulan maiu, hosi postu kolokasaun tolu hanesan Batugade, Salele no Sakato, hamutuk dolár rihun neen nolu, atus haat rua nolu resin hitu.

Hosi Postu Batugade hatama dolár rihun haat nolu resin ida, lima nolu resin sia. Hosi Postu Salele kolleita dolár rihun sanolu resin haat, atus ualu rua nolu resin tolu.

Hosi Postu Sakato, dolár rihun haat, atus lima haat nolu resin lima. Totál reseita ne’eb’e ita koleta iha postu tolu ne’e hamutuk dolár rihun neen nolu, atus haat rua nolu resin hitu.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!