Teofilo husu Governu foun dignifika atleta prestadu
DILI, 12 juñu 2023 (TATOLI) – Atleta modaliade atletizmu Teofilo Freitas ne’ebé konkista medalla rua iha ASEAN Para Games Kamboja foin lalais ne’e husu ba Governu foun presiza tau atensaun másima ba desportu iha Timor-Leste liuliu lei prémiu ba atleta sira ne’ebé hetan medalla osan mean iha eventu internasionál sira.
“Ba Governu foun ne’ebé sei mai se bele halo revizaun ba diploma ministeriál kona-ba atribuisaun prêmiu ba atleta prestasaun sira, tamba lei ne’e rasik lá fó espasu ba ami atu hetan prémiu ne’ebé iha tamba atleta Ema ho Defisiénsia ne’e fahe ba kategori barak entaun imposível ba ami atu to’o rekezitu ne’e”, Teofilo dehan.
Ho nune’e, orgullu ba medalla ne’ebé nia ho kolega sira konkista iha eventu internasionál ASEAN Para Games foin lalais ne’e iha Kamboja.
“Ha’u sente kontente no orgullu bele hetan medalla iha eventu importante ne’e”, Teofilo dehan ba Agência TATOLI, segunda ne’e.
Partisipa iha eventu ne’e kompostu hosi modalidade neen hanesan paralimpic, Table tennis, Natasaun, Swimming ho Xadrez no Atletismu hosi Federasaun neen ne’e konsege hetan Medalla osan mean ru no osan metan lima ho totál medalla hitu.
Jogu ASEAN Para Games ba dala-12 ne’e atleta hamutuk na’in neen mak hetan medalla.
Kona-ba prémiu ba atleta sira SEJD sei hare fali relatóriu hosi Komite Paralimpiku Timor-Leste (CPNTL-sigla portugés) aprezanta relatóriu ho nível partisipasaun kompetisaun tuir kritériu ne’ebé mak iha depois diskute montante hodi atribui kada situasaun no prestasaun ne’ebé atleta sira iha.
Garantia katak iha tinan ida ne’e, iha orsamentu ba prémiu nian tau hela iha Orsamentu Jerál Estadu (OJE) 2023 maibé prosesu atu hasai iha mandatu ida ne’e labele tanba mandatu ne’e termina iha fulan junu nia-laran.
Ho nune’e, pagamentu ba atleta prestadu sira, Governu foun mak sei halo pagamentu tuir tipu medalla no kategoria eventu.
Medalla hitu ne’ebé konkista husi atleta sira mak atletismu medalla osan mean rua no metan ida, tennis meza medalha osan metan tolu, power lifting osan metan ida.
Jornalista: Hortencio Sanchez
Editór : Zezito Silva
