Edukasaun Baucau husu MEJD aselera termu entrega PKRE tinan 2022
BAUCAU, 13 juñu 2023 (TATOLI) – Servisu Munisipál Edukasaun Baucau husu diresaun nasionál parke eskolár iha Ministériu Edukasaun, Juventude no Desportu (MEJD) atu aselera termu entrega atu estudante sira utiliza ba prosesu aprendijazen.
Diretór Servisu Munisipál Edukasaun Baucau, Augosto Ornai Ximenes, esplika, projetu PKRE tinan-2022 munisípiu Baucau finaliza ona eskola 25 no hela eskola haat mak iha faze finalizasaun no tuir planu sei remata iha fulan-agostu.
“Projeitu 25 foti ona orsamentu pursentu 100, signifika remata ona no hein de’it nasionál entrega formatu termu entrega atu nune’e grupu komunitária sira prienxe atu eskola sira utiliza,” Diretór Servisu Munisipál Edukasaun Baucau ba Agência TATOLI iha Vila Nova, tersa ne’e.
Hosi projetu hamutuk 30 komposta hosi eskola 29 implementa hosi grupu komunitária no eskola ida mak liuhosi faze konkursu no projetu 17 mak simbolikamente inaugura hosi Primeiru Ministru Taur Matan Ruak iha fulan-janeiru tinan-ne’e.
Nune’e projetu 25 mak finaliza ona, enkuantu projetu lima seluk iha faze finalizasaun hanesan Eskola Báziku Filiál (EBF) Ossolia , EBF Abulir, postu Quelicai, EBF Katolika Lalulai, postu Laga no EBF Bailari, Samalari, postu Baguia.
Enkuantu EBF Bucoli mak liuhosi prosesu konkursu iha Ministériu Obra Publika nasionál ne’ebé parte kompañia sira halo ona vizita terrenu no sei konstrui iha tempu badak.
Projetu hirak refere hahú implementa iha fulan-fevereiru tinan-kotuk ho total alokasaun orsamentu hamutuk $3.001.683,69 ne’ebé kada eskola konstrusaun no reabilita hanesan sala eskola, laboratóriu no saneamentu.
Jornalista : Natalino Belo
Editór : Evaristo Soares Martins
