Ekipa ‘’study tour’’ hosi Austrália vizita Xanana Reading Room
DILI, 13 juñu 2023 (TATOLI) – Ekipa study tour hosi Austrália hamutuk ema na’in-sia, ohin, akompaña hosi Kristy Sword vizita Xanana Reading Room.
Vizita study tour hosi Austrália ba sala leitura hamutuk dala lima ona ho objetivu atu haree Timor-Leste nia pasajen turístiku no kultura nasaun ne’e nian.
Fundadora Sala Leitura, Kirsty Sword Gusmão, dehan fatin ne’e sai hanesan fatin ba joven no labarik sira atu aprende lee no hadomi kultura.
“Sala Leitura ne’e fornese oportunidade ba labarik sira hosi eskola primaria to’o sekundária atu mai aprende kona-na lian english, aprende lee no oinsa mak hadomi sira nia kultura rasik, ohin ekipa hosi Austrália mai vizita ne’e atu haree ita-nia sítiu turístiku sira no oinsa buka hatene kona-ba kultura Timor-Leste nian”, Kristy dehan iha edifísiu Lecidere, tersa ne’e.
Nia hatutan, misaun Sala Leitura nian mak atu loke labarik sira nia neon, iha matéria aprendizajen atu eleva sira-nia koñesimentu no kapasidade.
“Joven sira bele mai aprende inglesh no mós envolve iha atividade diskusaun kona-ba tópiku ne’ebé relevante ba joven sira-nia moris loroloron nian”, nia dehan.
Tanba ne’e, nia orgullu tebes ho Sala Leitura ne’ebé kria ho atividade no programa oioin hodi fó inspirasaun ba labarik sira ne’ebé kuriozu hakarak aprende atu lee.
Nia akresenta, Timor-Leste ladún iha kultara kona-ba lee, buat ruma ne’ebé presiza dezenvolve ba joven no labarik sira.
Jornalista: Hortencio Sanchez
Editór : Zezito Silva
