DILI, 12 juñu 2023 (TATOLI) – Komandante Komandu Pesoál no Formasaun Polísia Nasionál Timor-Leste (PNTL) Superintendente Xefe Polísia, Arquimino Ramos, hateten iha 16 juñu, Komandu PNTL sei halo serimónia hodi despede membru PNTL 158 ne’ebé reforma hodi ba vida sivíl.
“Komandante Jerál hatún despaixu hodi harii komisaun ida ba serimónia despedida membru nain 158 ne’ebé pasa ona ba vida reforma. Ha’u rasik maka lidera komisaun ne’e atu halo serimónia despedida. Iha sesta agora loron 16 fulan juñu 2023, ita halo despedida ida ba ita nian kolega sira ne’e”, Arquimino Ramos bainhira koalia iha programa entervista eskluziva iha Farol, tersa ne’e.
Arquimino esplika, serimónia despedida ne’e nudar jestu ida hodi dignifika dedikasun no abnegasaun membru PNTL 158 instituisaun PNTL, hahú hosi ezisténsia PNTL nian.
“Ita konsidera ita-nia kolega sira ne’e hanesan ema ne’ebé hahú servisu iha instituisaun ne’e. Ita mak hahú hamutuk PNTL ne’e hosi mamuk, iha susar laran, tempu balun ita kontente hamutuk, tempu balun ita triste, tempu balun ke ita iha situasaun depresaun, to’o tempu ona sira bá, komandu PNTL tenke trata sira ho dignu”, nia dehan.
Nia dehan, iha ministériu seluk hosi nia maluk, kuandu funsionáriu sira tama ona ba idade reforma idaidak ba trata iha Institutu Nasionál Seguransa Sosiál (INSS).
“Ami-nia lae, Komandu Pessoa no Formasaun halo kordenasaun di’ak ho INSS. Ita ajuda ita-nia maluk sira ne’ebé atu reforma, hodi trata sira-nia dokumentu ba reforma nia iha INSS no agora daudaun ne’e finaliza ona, hein de’it sira nian reforma”, nia konklui.
Jornalista: Natalino Costa
Editór : Zezito Silva
