Konstrusaun kampu futeból haat iha Dili atinje 28%

DILI, 13 juñu 2023 (TATOLI) – Diretora Nasionál Patrimóniu Dezenvolvimentu Infraestrutura Sekretáriu Estadu Juventude no Desportu (SEJD), Maria Luisa Monteiro, informa progresu ba konstrusaun kampo futeból haat iha Dili laran atinje ona 28,61%.

“Progresu kumulativu ba kampu haat iha Dili laran ne’ebé SEJD parseria ho KOICA, atinje ona 28, 61%”, Diretora dehan ba Agência TATOLI, iha edifísiu SEJD Dili, tersa ne’e.

Kampu haat ne’ebé konstrui iha tinan kotuk, kompostu hosi Becora, Bintang Bidau, Comoro no Kampung Alor.

Kampu haat ne’e konstrui tanba Governu Korea Súl apoia Governu Timor-Leste hodi konstrui kampu futeból haat ho orsamentu milliaun $2.4-resin.

Projetu ne’e sei konstrui hosi kompaña timoroan ho naran CHLN Timor Unipesoal Lda tanba durante KOICA loke konkursu kompaña refere mak sai hanesan vensedór hodi konstrui kampu haat ne’e ho durasaun kontratu fulan-18 tenke intrega ona ba Governu Timor-Leste.

Jornalista: Hortencio Sanchez

Editór : Zezito Silva