Vise-MS husu Governu foun investe nafatin rekursu umanu
DILI, 13 juñu 2023 (TATOLI) – Vise-Ministru Saúde (MS) Bonifacio Maucoli dos Reis, husu ba Governu foun atu nafatin investe ba rekursu umanu iha Ministériu Saúde atu halo atendimentu ba pasiente sira iha Timor-Leste.
“Ha’u husu ba governasaun foun ne’ebé mak atu mai hodi investe nafatin ba rekursu umanu, liuliu haruka médiku sira ba estuda sub-espesialista iha rai liur hodi bele halo tratamentu mesak iha rai-laran tanba moras barak ita halo transferénsia ba rai liur”, Bonifacio Maucoli dos Reis hateten ba jornalista sira iha nia kna’ar fatin MS Caicoli ohin.
Nia informa, Governu fou tenke haruka nafatin médiku sira ba foti sub-espesialista atu Timor-Leste halo atendimentu rasik ba moras fuan no moras kankru sira.
“Ba oin, ita presiza haruka médiku sira ba foti sub-espsialista atu trava ona sistema transferénsia moras ba rai liur. Tanba ita hatene katak moras ne’ebé mak ita haruka barak liu mak moras kardiolojia, kankru no mós moras sira seluk”, nia esplika.
Nia rekorda, iha semana kotuk liubá Ministériu Saúde mós halo ona lansamentu ba sentru onkolojia mezmu ekipamentu seidauk sufistikadu maibé governu foun bele kompleta ekipamentu atu pasiente sira ne’ebé sofre moras kankru bele halo tratamentu iha rai-laran.
“Ita foin daudauk halo ona lansamentu ba sentru onkolojia nian mezmu ita seidauk iha ekipamentu sufistikadu maibé pelumenus inisia ona depois ita kompleta ho ekipamentu atu ba pasiente sira ne’ebé mak sofre moras kankru ita bele halo kemotearpia iha rai-laran”, nia relata.
Bonifacio subliña, sentru kardiolojia iha lahane Oitavu Governu konstituisionál inisia ona maibé infelizmente seidauk realiza tanba sei problema ho infraestrutura.
Nia rekomenda ba Governu foun tenke kontinua servisu ne’ebé mak oitavu Governu husik hela tanba moras fuan ne’e Governu gasta ona osan barak liu durante transferénsia ba nasaun Indonézia, Singapura no Malasia.
“Durante ita halo transferénsia moras ba rai liur ne’e kada tinan kuaze millaun $16 mak ita selu ba ospitál sira iha rai liur hodi halo atendimentu ba ita-nia pasiente sira”, nia konklui.
Jornalista : Felicidade Ximenes
Editór : Zezito Silva
