Estoke ran menus afeta ba pasiente sira ne’ebé presiza tulun
DILI, 14 juñu 2023 (TATOLI) – Xefe Interina Banku Sangue iha Hospitál Nasionál Guido Valadares (HNGV), Agostinha Alves, hateten estoke ran ne’ebé menus mak afeta ba pasiente sira ne’ebé mak presiza ran.
“Banku sangue daudaun ne’e hasoru hela krize ran, se ran la iha fó risku ba pasiente sira, entaun iha de’it ran balun ne’ebé rezerva ba pasiente sira ne’ebé presiza tulun”, Agostnha alves informa iha nia kna’ar fatin HNGV, ohin.
Nia dehan, iha ran balun ne’ebé mak rai hela ba pasiente sira ne’ebé mai emerjénsia nia-laran mak sei iha estoke ran hanesan A+ B+ AB+ no O+.
“Ita iha ran balun ne’ebé rai hela ba pasiente sira ne’ebé presiza, hanesan A+ iha hitu, B+ iha lima, AB+ iha neen no O+ iha neen, entaun estoke ran sira ne’e ita rai ba ema ne’ebé presiza ran iha situasaun emerjénsia nian”, nia afirma.
Nia haktuir, kada fulan Banku Sangue halibur ema doasaun ran hamutuk 20 to’o 30, entaun ida ne’e labele responde ba nesesidade ospitál nian.
“Kada fulan, ema voluntáriu sira halo doasaun ne’e mak hamutuk 20 to’o 30 ida ne’e seidauk bele responde ba nesesidade pasiente nian”, nia subliña.
“To’o ohin loron, ami halibur ran ne’e husi estudante universitáriu sira, ONG sira, instituisaun Governu nian no seluk tan tanba ne’e ita presiza aumenta númeru doadór sira hodi ajuda ita hodi atende pasiente sira-nia nesesidade”, nia relata.
Nia sujere ba Governu foun tenke transforma Banku Sangue sai instituisaun públika ida, atu bele iha kapasidade no rekursu ne’ebé sufisiente atu organiza doasaun ran iha nível munisípiu sira.
“Ita-nia rekursu umanu oras ne’e iha médiku ida, enfermeiru rua no profisionál laboratóriu hamutuk 17-resin ne’ebé mak servisu iha ne’e. Maibé ha’u sujere ita presiza aumenta rekursu umanu barak inklui mós doutór sira ne’ebé tau matan ba ran, hanesan hematolojista sira”, nia dehan.
rekorda katak Banku Sangue durante ne’e kolabora ho Cruz Vermelha Timor-Leste (CVTL) hodi organiza atividade doasaun ran hodi fasilita ba ospitál referál no rejionál sira no klínika privadu sira iha nasaun ida ne’e.
Jornalista : Felicidade Ximenes
Editór : Zezito Silva
