DILI, 14 juñu 2023 (TATOLI) – Ministra Negósiu Estranjeiru no Kooperasaun (MNEK), Adaljiza Magno, simu vizita kortezia hosi Adjuntu Xefe Misaun Embaixada Emiradus Árabe Unidus (EÁU) iha Jakarta, Indonézia, Shaima Salem Alhebsi, hodi fortalese kooperasaun relasaun bilateral ba benefísiu mútua nasaun rua liuhosi investimentu iha área potensiál sira
Nota imprensa ne’ebé Tatoli asesu, ohin, katak objetivu hasoru malu ne’e hodi habelar liután kooperasaun no investimentu iha área potensiál sira hanesan infraestrutura, ospitalidade no área importante sira seluk.
Iha okaziaun ne’e, dignitáriu rua ne’e fahe mós hanoin kona-ba Timor-Leste nia prioridade no preparasaun atu sai nu’udar membru pleno ASEAN nian.
Relasiona ho asuntu ida ne’e, EAU hanesan parseiru diálogu ba ASEAN, hato’o mós sira-nia prontidaun atu apoiu Timor-Leste iha área asisténsia téknika.
Entretantu, durante sorumutuk ne’e, Ministra Magno no Adjuntu Xefe Misaun Shaima diskute mós kona-ba Timor-Leste nia preparasaun atu estabele embaixada iha rai EÁU no troka mós hanoin kona-ba diálogu polítiku entre rai-rua iha futuru.
Jornalista: Hortencio Sanchez
Editór : Zezito Silva
