CNE sei atribui sertifikadu ba ofisiál supervizaun Baucau
BAUCAU, 14 maiu 2023 (TATOLI) – Komisaun Nasionál Eleisaun (CNE, sigla portugés) sei atribui sertifikadu ba ofisiál supervizaun ne’ebé halao knaar durante eleisaun parlamentár iha munisípiu Baucau.
Diretór CNE Baucau, Esmeraldo Damião Belo, esplika, objetivu hosi atribuisaun sertifikadu refere nu’udar símbolu rekoñesementu ba ofisiál supervizaun hamutuk na’in-184 ne’ebé kontribui fó susesu ba prosesu festa demokrasia iha munisípiu Baucau.
“Sertifikadu nu’udar símbolu rekoñesimentu ba sira no bukae iha futuru bainhira presiza utiliza ba asesu serbisu iha instituisaun no CNE rasik,” Diretór CNE Baucau informa ba Agência TATOLI iha Vila Nova, kuarta ne’e.
Ofisiál supervizaun eleitorál hirak-ne’e tuir planu sei termina kontratu iha loron-30 fulan juñu hafoin asina kontratu iha fulan-maiu komposta hosi 180 hala’o knaar iha postu administrativu neen no na’in-haat hala’o knaar iha eskritóriu.
Esmeraldo Belo, argumenta, ofisiál supervizaun hirak-ne’e nu’udar responsabilidade hosi CNE nune’e presiza apresia tanba sei kolabora nafatin bainhira hakarak kolabora ho CNE iha futuru.
Tuir planu atribuisaun sertifikadu ba ofisiál eleitorál iha loron-30 fulan-juñu liuhosi serimónia agradesementu ne’ebé tuir planu sei partisipa hosi CNE nasionál, Ministériu Administrasaun Estatal (MAE), Autoridade Administrasaun Munisipál Baucau no konvidadu sira.
Jornalista : Natalino Belo
Editór : Evaristo Soares Martins
