Entre agostu-setembru hahú konstrui kampu FFTL
ERMERA, 15 juñu 2023 (TATOLI) – Prezidente Federassun Futeból Timor-Leste (FFTL) Francisco Jerónimo hateten, iha fulan agostu no setembru tinan ne’e sei halo konstrusaun ba kampu FFTL.
“Ita-nia kampu demokrásia iha fulan agostu-setembru sei konstrui hosi Federation International Football Assosiation (FIFA)”, Prezidente dehan ne’e iha Gleno, kinta ne’e.
Nia hateten, prosesu hotu la’o los ona, hein halo konstrusaun atu bele fó espasu ba selesaun nasionál seniór no juniór atu hala’o treinamentu.
Konstrusaun ba kampu ne’e finansia hosi fundu Asian Football Confederation (AFC) no FIFA.
Tuir nia, montante hosi orsamentu seidauk hatene los tanba buat hotu finansia direta hosi FIFA no AFC no kompaña internasionál mak sei kaer obra ne’e.
Enkuantu Estádiu Munisípal Dili entrega ona ba FIFA mak sei halo konstrusaun iha tempu besik.
“Estádiu Dili ita entrega ona ba FIFA atu harí Estádiu di’ak ida ba ita, atu nune’e ita bele sai uma na’in ba jogu internasionál balun bele hatama reseita ba Estadu”, Francisco adianta.
Nia hatutan, bainhira Estádiu Dili remata ona jogu AFF no AFC bele halao iha Timor-Leste Hotel sira iha Dili laran bele hetan ona benefisiu.
Jornalista: Hortencio Sanchez
Editór : Zezito Silva
