Kompañia finaliza ona konstrusaun edifísiu foun CNE Baucau
BAUCAU , 14 maiu 2023 (TATOLI) – Kompañia responsável finaliza ona konstrusaun edifísiu foun Komisaun Nasionál Eleisaun (CNE, sigla portugés) munisípiu Baucau.
Diretór CNE Munisípiu Baucau, Esmeraldo Damião Belo, esplika, edifísiu foun refere hahú konstrui iha fulan-dezembru 2022 liuhosi apoia orsamentu hosi parseiru dezenvolvimentu United Nations Development Programme (UNDP) ho durasaun kontratu fulan-neen.
“Agora daudaun finaliza ona no hein governasaun foun atu hamutuk halo serimónia inaugurasaun,” Diretór CNE Baucau informa ba Agência TATOLI iha Vila novay, kuarta ne’e.
CNE Baucau iha ona koordenasaun ho UNDP relasiona ho preparasaun ba inaugurasaun edifísiu foun refere nune’e futuru mai bele utiliza ba atendomentu publiku relasiona ho atividade eleitorál iha Baucau.
Esmeraldo Belo agradese ba UNDP ligadu ho apoia orsamentu hodi konstrui edifísiu foun tanba durante ne’e CNE Baucau hasoru difikuldade tanba kondisaun uma tempu okupasaun Indonézia no kloot nune’e difikulta bainhira hasoru eleisaun.
Tuir planu edifísiu tuan sei halo reabilitasaun hodi halo aula enkontru relasiona ho atividade serbisu preparativu iha eleisaun sira tuir mai hanesan edukasaun sívika no fatin tratamentu.
Totál orsamentu hamutuk (millaun $129-resin) $128.016,83, ne’ebé responsabiliza hosi kompaña lókal warfour all unipesóal. Lda ne’ebé tuir dezeñu iha sala aula ba dirijente, xefe departamentu, funsionáriu, ofisiál administrativu, ofisiál supervizaun, sala lojístika ne’ebé fasilidade ba ema ho defisiénsia.
Jornalista : Natalino Belo
Editór : Evaristo Soares Martins
