Maiu-Sentru Internamentu Vera Kruz rejista má nutrisaun grave 20
DILI, 15 juñu 2023 (TATOLI) – Koordenadór Programa Nutrisaun Sentru Internamentu Vera Kruz, Antonio da Cruz, dehan má nutrisaun grave iha fulan maiu ne’e hamutuk 20 no moderadu 143.
“Fulan maiu, labarik sira ho idade 0 to’o tinan lima vizita ka tetu iha Sentru Saúde Vera Kruz hamutuk 1.177, husi ne’e labarik sira ne’ebé ho kategoria normál hamutuk 1.014 ka 86%, ba sira ne’ebé indika má nutrisaun moderadu hamutuk 143 ka 12% no grave 20 ka 1%’’, Antonio da Cruz, informa ba TATOLI iha nia kna’ar fatin Sentru Internamentu Vera Kruz, ohin.
Nia afirma, husi labarik sira ne’ebé kategoria má nutrisaun moderadu no grave, médiku sira halo tratamentu ba sira to’o rekupera.
“Ita nia estoke suplementu alimentár nutritivu ka susuben F-75 no F-100 daudaun ne’e sufisiente hodi atende ba labarik sira bainhira iha kazu má nutrisaun ruma”, Antonio da Cruz.
Nia dehan, susuben F-75 no F-100 ne’e bazea ba médiku sira ne’ebé mak halo tratamentu iha ne’e, bainhra sukat labarik nian todan mak kiik, ida ne’e indika ona ba má nutrisaun grave, médiku sira bele fó ona suplementu alimentar ne’e tuir nia idade.
“Bainhira ita tetu nia todan kiik ami fó kedas susuben F-75 no F100 hodi sira hemu kada oras tolu entaun ita fó ba labarik sira ne’e ho idade tinan ida to’o tinan lima”, nia konklui.
Jornalista : Felicidade Ximenes
Editór : Zezito Silva
