Tribunál análize pedidu ezíliu Filipinu 13
DILI, 15 juñu 2023 (TATOLI) – Juiz Administradór Tribunál Judisiál Primeira Instánsia Dílí, (TJPID), Afonso Carmona, simu ona pedidu rekursu sidadaun estranjeiru hosi Filipina 13 ne’ebé hakarak husu ezíliu iha Timor-Leste.
“Ita bo’ot sira hatene kona-ba pedidu ne’ebé ema na’in 13 hosi Filipina, prosesu tama mai Tribunál iha semana liubá”, Afonso Carmona ba jornalista sira iha TJPID Colmera, kinta ne’e.
Nia dehan, hafoin Tribunál Judisiál Primeira Instánsia simu tiha pedidu rekursu, sidadaun estranjeiru hosi Filipina 13 ne’ebé hakarak iha Timor-Leste, hanesan Juiz Adminitradór Tribunál Judisiál Primeiru Instánsia Díli distribui kedan prosesu ne’e ba Juiz sira atu haree.
“Entaun ba kazu ida ne’e prosesu la’o hela. Ita distribui ona ba Juiz Titulár ona. Ha’u labele dehan Juiz tenke halo lalais prosesu ne’e. Hau labele dehan Juiz tenke termina lalais prosesu ne’e. Prosesu ida tenke tuir nia regra maka hanesan ne’e”, Juiz Afonso Carmona informa.
Afonso adianta, sidadaun 13 hosi Filipina ne’e agora daudaun sei hela iha teritoriu nasionál, hela iha Embaixada Filipina, labele sai hosi Timor-Leste, bainhira Tribunál seidauk hatún desizaun ruma.
“Sira tenke iha ne’e nafatin, tanba sé kuandu sira fila tiha ona, ita atu halo desizaun ba sé. Desizaun Tribunál nian atu aplika ba ema, desizaun hotuhotu presiza sira-nia prezensa sei iha ne’e” nia revela.
Rekorda katak filipinu sira husu ba Ministru Interiór hodi hela iha Timor-Leste, maibé hafoin Servisu Migrasaun no Ministériu Interiór haree no análize pedidu ne’e la priénse rekezitu legál ruma.
Nune’e, Ministériu Interiór indefere pedidu ba sidadaun Filipina13 ne’ebé hakarak husu hodi hela iha Timor-Leste. Tanba ne’e Tribunál sei haree ho baze lei Kódigu Sivíl, artigu 52 ne’ebé fó dalan katak rekursu adminisrativu tenke reclama liuhosi Tribunál Judisiáriu Primeira Instansia, la’os hosi Tribunál Rekursu.
Jornalista: Natalino Costa
Editór : Zezito Silva
