Empreza japonés hakarak loke Fábrika Ró iha Timor-Leste
DILI, 16 juñu 2023 (TATOLI) – Embaxadór Timor-Leste ba Japaun Elidio Ximenes da Costa, informa empreza internasionál hosi Japaun, Sunesi Company hakarak tebes atu loke Fábrika Ró iha Timor-Leste.
“Sunesi Company iha interese atu loke Fábrika Ró iha Timor-Leste, sira-nia kompaña loke ona fábrika iha Filipina, Paraguay, entaun sira haree Timor-Leste iha potensiál atu loke fábrika”, embaxadór dehan ba Agência TATOLI, via media sosiál, sesta ne’e.
Elidio hateten, empreza sei vizita Timor-Leste iha fulan agostu mai ne’e, empreza sei hasoru malu ho Governu Timor-Leste atu ko’alia klean kona-ba oinsa mak atu loke fábrika ne’e.
“Ida ne’e sei loke kampu traballu iha Timor, ita husu atu Governu ida ne’e bele fasilita. Vantajen mai ita mak iha ona ró lubuk ida maibé manutensaun sempre ba halo iha Surabaya, maibé empreza Japaun ne’e loke duni nia fábrika iha Timor-Leste mak ita-nia Rr sira la presiza ba halo manutensaun iha Indonézia”, diplomata ne’e konklui.
Jornalista: Hortencio Sanchez
Editór : Zezito Silva
