DILI, 16 Juñu 2023 (TATOLI) – Embaixadór Xina iha Timor Leste hamutuk ho ekipa médika xinéz, ohin, iha salaun HNGV, entrega ekipamentu médiku sira ho forma holter ECG (LEPU) no laptop neen ba Hospitál Nasionál Guido Valadares (HNGV) hodi hadia sistema servisu Kardiolojia nian ba povu Timor-Leste.
Ministra Saúde Odete Maria Freitas Belo agardese ba apoiu hosi Governu Xina nian, ne’ebé bele hametin sistema servisu Kardiolojia iha HNGV no munisípiu sira.
“Husi ekipamentu sira ne’e bele ajuda ona servisu kardiolojia nia iha ita-nia rain, entaun ami agradese tebes ba apoiu ne’ebé mak Governu Xina nian hodi hametin servisu kardilojia ba oin”, nia dehan
Nia rekorda, antes ne’e Ministériu Saúde hato’o pedidu ba Embaixadór Xina iha Timor-Leste hodi apoia ekipamentu ne’e no ohin loron instrumentu sira ne’e entrega ho tipu hanesan mai iha HNGV.
“Pedidu ne’e ami hato’o iha tempu naruk ona no ohin ami sei iha oportunidade atu simu ekipamentu ne’ebé Governu Xina aprezenta ba HNGV, liuliu ekipamentu sira ne’ebé relasiona ho moras fuan ka Kardiolojia nian”, nia afirma.
Iha fatin hanesan, Embaixadór Xina ba Timor-Leste, Xu Danyang, informa Xina sempre fó apoiu makas ba dezenvolvimentu médiku no saúde Timor-Leste.
“Iha tinan tolu liubá epidemia, Xina no Timor-Leste fó apoiu ba malu no tulun hasoru difikuldade komún sira no ohin loron, ekipa médika Xina nian iha Timor-Leste fó doasaun ba set ECG no laptop sira atu promove projetu ezaminasaun eletrokardiograma dinámiku ida iha ospitál sira iha Timor-Leste tomak, hodi hadia tratamentu moras fuan iha Timor-Leste”, nia katak.
Espesialista Kardiolojia HNGV, Herculano Seixas dos Dantos, hateten husi ekipamentu ne’e sei fahe ba ospitál sira iha munisípiu Maliana, Suai, Baucau no RAEOA tanba ospitál sira-ne’e iha ona Kardiolojista sira.
“Ekipamentu ne’e atu halo monitorizasaun ba fuan, ne’ebé durante oras 24 nia-laran, ho objetivu husi estudu ne’e mak atu deteta tipu problema fuan nian, depois halo manutensaun bázika husi rezultadu monitorizasaun ba ekipamentu ne’e nian”, nia hateten.
Tuir nia, to’o agora moras-fuan iha HNGV makas liu entre moras sira seluk, iha 2022, HNGV rejista pasiente hamutuk 152 ho moras-fuan no mate hamutuk 28.
Jornalista : Felicidade Ximenes
Editór : Zezito Silva
