DILI, 19 juñu 2023 (TATOLI)—Banku Sentrál Timor-Leste (BCTL, sigla portugés) planeia ona atu instala mákina rua iha areadór banku nian hodi fasilita públiku sira bainhira presiza troka osan tahan ba sentavu.
“Dader-dader ema barak loos iha edifísiu banku sentrál nia oin, ida-ne’e ema ba troka osan ba sentavu. Banku sentrál iha planu tempu besik atu instala mákina rua iha banku sentrál ninia oin kedas, atu nune’e sé mak hakarak troka ninia osan hosi nota ba koin la persiza ba forma ona, tanba ami nota katak iha inkonviniénte iha estudante sira, bainhira ba forma hodi osan $5 tahan ba troka osan-rahun hodi selu transporte, ida-ne’e ladun ajuda sira ka fasilita sira-nia tempu,” Governadór BCTL, Abraão de Vasconselos, hateten iha ámbitu lansamentu relatóriu inkluzaun finanseira tinan 2022, iha Otél Novo Turismo, segunda ne’e.
Notísia relevante : BCTL sujere Governu uza fundu petrolíferu ho kuidadu
Governadór esklarese, kona-ba sentavu ne’ebé prodús maibé la uza, konsideradu hanesan iha nível aseitasaun menus, ne’ebé hanesan kondisaun naturál tanba presu sasán maioria iha merkadu folin liu.
“Ne’e situasaun ne’ebé mak ita infrenta maibé iha loja sira utiliza nafatin maski la’ós ho volume barak, enkuantu banku sentrál mós la prodús moeda sentavu barak tanba nia uzu la boot,” nia akresenta.
Tanba ne’e, BCTL introdús ona programa dijitalizasaun hodi fasilita troka osan fíziku ho osan eletróniku.
“Ezemplu estudante ida atu sa’e mikrolete bainhira atu selu no fó osan ho montante boot maka laiha osan rahun hodi volta maibé bele halo tranzasaun ho eletróniku,” Governadór esplika.
Nune’e, banku sentrál enkoraja instituisaun finanseira sira atu introdús plataforma eletróniku atu fasilita tranzasaun di’ak liu.
Governadór dehan, bainhira banku sira atu tau osan tahan iha mákina ATM sira, ninia rekezitu mínimu ne’ebé tenke adere mak tau osan la tuir ninia kritériu, ezemplu menus kualidade 60% maka mákina la aseita.
Jornalista : Antónia Gusmão
Editora : Julia Chatarina