Dezeñu edifísiu TJPI tolu inklui rezidénsia ba Juiz sei konklui tinan ne’e

DILI, 19 juñu 2023 (TATOLI) – Prezidente Tribunál Rekursu Deolindo dos Santos, hateten tinan ne’e sei finaliza dezeñu ba konstrusaun edifísiu Tribunál Judisiál Primeira Instánsia sira inklui rezidénsia ba Juiz sira.
Nia dehan, tuir lei organizasaun judisiáriu foun ejize tenke harii Tribunál Judisiál Primeira Instánsia sira iha munisípiu hotu.
“Ita hatene agora dadaun ita hahú ona konstrusaun edifísiu Tribunál Judisiál Primeira Instánsia Díli iha hela prosesu konstrusaun no konstrusaun edifísiu Tribunál Judisiál Primeira Instánsia munisípiu sira seluk inklui rezidénsia Juiz sira agora kompañia ne’ebé manán nain ba dezeñu iha ona. Ha’u rasik harii ona ekipa ne’ebé envolve hosi Juiz sira, Ajénsia Nasionál Dezenvolvimentu (ADN) inklui Ministériu Obras Públika (MOP) atu haree hamutuk dezeñu ba prosesu konstrusaun edifísiu Tribunál Judisiál Primeira Instánsia munisípiu sira seluk inklui rezidénsia Juiz sira, espera tinan ne’e bele konklui atu tinan oin ita hahú konstrusaun”, Deolindo dos Santos, iha nia intervesaun durante fó pose ba Juiz Administradór foun nain haat ne’ebé halao iha Tribunál Rekursu Caicoli, segunda ne’e.
Deolindo hateten, tinan oin sei harii edifísiu TJPI iha munisípiu tolu hanesan Viqueque, Ermera no Bobonaro inklui rezidénsia ba Juiz sira.
“Kuandu konsulta ba dezeñu ne’e hotu ona, tinan oin ita hahú halo kontrusaun edifísiu Judisiál Primeira Instánsia no rezidénsia ba Juiz sira iha munisípiu tolu Viqueque, Ermera no Bobonaro. Kuandu obra ne’e lao ona entaun ita mós foku atu halo konstrusaun ba edifísiu Tribunál Judisiál Primeira Instánsia no rezidénsia ba Juiz sira iha munisípiu sira seluk tanba konstrusaun ba edifísiu sira ne’e ita halo fazeadamente”, nia iforma.
PTR ne’e mós realsa, iha tempu badak ekipa Tribunál Rekursu sei dezloka ba munisípiu tolu atu haree rai ba edifísiu TJPI no rezidénsia ba Juiz sira iha munisípiu tolu hanesan Viqueque, Ermera no Bobonaro.
Jornalista: Natalino Costa
Editór : Zezito Silva

