Elementu PCIC envolve agresaun fízika hasoru PNTL submete ona ba averiguasaun

DILI, 20 juñu 2023 (TATOLI) – Porta-vós Polísia Siéntifika Investigasaun Kriminál (PCIC, sigla portuges), Octavio da Costa Araujo, informa PCIC halo ona averiguasaun ba memebru PCIC ho insiál JK ne’ebé halo agresaun fízika hasoru membru PNTL ho insiál JL iha ótel HK Hudi-Laran foin lalais ne’e.
Membru PCIC ho inisiál JK ne’e submete ba prosesu averiguasaun ho númeru prosesu 06/VI/AV.2023.
“Agora ida prosesu interna PCIC nian, ita halo ona averiguasaun. Ha’u bele hateten katak prosesu lao ona ita ba ona iha lokál, ita rekolla ona seguransa sira ne’ebé mak momentu iha kalan ne’ebá hodi sai hanesan testamuña. Ita rekolla ona CCTV, depois ita sei públika nian rezultadu”, Octavio da Costa Araujo hateten ba jornalista sira iha edifisiu PCIC Colmera, tersa ne’e.
Nia esplika, prosesu averiguasaun ne’e nudar prosesu interna ne’ebé lao iha PCIC, sei la viola segredu justisa, segredu profisionál. Tanba prosesu averiguasaun ne’e nian objetivu atu hatene nia verasidade hosi informasaun hosi akontesimentu.
”Depois prosesu averiguasaun ne’e iha ne’ebá mak iha faktu no prova katak ami nia ema ne’e komete sala duni, entaun ita foin hakat ba prosesu disipliñar. Aleinde nia membru simu konsekuénsia penál no mós hetan sansaun administrativa no prosesu disiplinñar”, Octavio da Costa Araujo informa.
Enkuantu kona-ba prosesu kriminál, Porta-vós PCIC Octavio, hateten prosesu kriminál kontinua lao tanba prosesu ne’e avansa ho tipu rua, mak prosesu kriminál ida seluk mak prosesu internál PCIC nian no ida internal PCIC mak agora halo ona prosesu averiguasaun ba membru PCIC ne’e no ida prosesu kriminál rejista ona ho NUC 0160/23.PNSIK.
Jornalista: Natalino Costa
Editór : Zezito Silva

