Indonézia prefere Timor-Leste sai lalais membru ASEAN
DILI, 19 juñu 2023 (TATOLI) – Embaixadór permanente Reprezentativu Repúblika Indonézia ba ASEAN, Derry Aman, hateten Indonézia komprometidu nafatin apoiu Timor-Leste sai lalais ba membru ASEAN.
“Indonézia iha komitmentu makas atu kontinua suporta Timo-Leste sai membru permanente ba ASEAN maske Timor-Leste daudauk ne’e hanesan nasaun membru observadór no iha oportunidade legál atu partisipa iha kualker enkontru kona-ba ASEAN”, Derry Aman dehan liuhosi komunikadu ne’ebé Agência TATOLI asesu, ohin.
Nia mós salienta tan, hafoin enkontru altu nível hosi lideránsa ASEAN iha KTT Labuang Bajo fó ona biban ba Timor-Leste hodi tama ba roadmap ASEAN sai full membership.
Bazeia ba roadmap ne’ebé mak iha, Timor-Leste sei priénse kritéria sira iha dezenvolvimentu Infaestrutura, Saúde, Edukasaun no mós asuntu interligadu sira seluk.
Embaxadór ASEAN iha Indonézia ne’e hato’o asuntu hirak ne’e iha ámbitu delegasaun pontu fokál na’in-10 husi kada liña ministeriál iha Jakarta Indonézia.
Iha okaziaun ne’e, ekipa delegasaun hasoru malu mós ho Diretora Dezenvolvimentu Rekursu Umanu ba Nível ASEAN ho nia estrutura tomak iha Sekretariadu ASEAN iha Jakarta hodi halo mós aprezentasaun asuntu importante liuliu kona-ba Pilar Sósiu Kultura ASEAN nian ba ekipa delegasaun Timor-Leste.
Iha oportunidade ne’e, fó biban ba delegasaun Timor-Leste hodi aprezenta sira nia-an tuir area servisu ne’ebé determinadu.
Nune’e formandu sira mós agradese ba oportunidade programa intensivu ne’e rasik hanesan parte ida ba hasa’e koñesimentu rekursu umanu TL nian hodi familiarize liutan preparsaun TL molok sai membru permanente ASEAN.
Reprezentante Instituisaun 10 ne’ebé mak partisipa iha programa Intensivu ba Pilár Sósiu Kultura ASEAN mak hanesan, Lídia A Imaculada da Conceição atuál Diretora Komidaun Funsaun Públiku, Emília Costa Magalhãs atuál pontu fokál Sekretáriu Estadu Arte no Kultura, Getrudis da Costa Araujo atuál pontu fokál Sekretáriu Estadu Ambiente, Alexandrina Verdial de S Gama atuál Sub. Inspetóra Sekretáriu Estadu Formasaun Profesional Empregu (SEFOPE), Adão Jorge Baptista Pinto husi Ministeriu Solidaridade Sosial no Inkluzaun (MSSI), Abel de Jesus Andrade pontu fokál Sekretáriu Estadu Juventude no Desportu (SEJD), Sergio da Costa Belo Official Programa husi Ministériu Saúde (MS) Henrique da Silva pontu fokál ba Asuntu Asean hosi Sekretáriu Estadu Igualdade no Inkluzaun (SEII), Elisio Verdial dos Santos atuál Diretór Nasionál Administrasaun Lokál Ministeriu Administrasaun Estatal (MAE) no-mós Mateus da Costa hosi Autoridade Protesaun Sivil (APC-sigla portugés).
Jornalista: Hortencio Sanchez
Editór : Zezito Silva
