Kalohan metan “hafalun” família Lobato
DILI, 19 juñu 2023 (TATOLI) – Kalohan metan falun metin família Lobato hodi hafutar matan-ween suli hosi ema ida-ida nia matan turu no suli hanesan udan-ween monu tuun hosi lalehan.
Tanbasá? Mosu novidade moruk ne’ebé lori “mate” nia liras mai falun Leorema-oan, Luis Lobato, lori semo ba Maromak nia kadunan santu, mate no husik hela nia família ho tekir-tekir de’it.
Molok kalan no loron fahe malu ba rua iha sabadu no domingu 17-18 juñu nia klaran hamosu tristeza bo’ot ba família Lobato hanesan kalohan metan ne’ebé hafalun metin família ne’e hodi hafutar matan wen suli iha ema ida-idak nia matan tanba mosu novidade moruk ne’ebé ema hotu seidauk aseita ba Luis Lobato atu bele husik hela mundu ne’e.
Ho nune’e Reprezentante Família Rogerio Lobato haktuir, iha loron sabadu ne’e Luis Lobato hamutuk ho família sira iha Rezidénsia Delta Nova joga halimar karta, hahú meiudia to’o tuku 07:00 kalan sente kole no ulun moras.
“Bainhira nia kole no ulun moras nia husu aimoruk balu hemu atu bele hapara kole no ulun moras ne’e, maibé iha meia-noite hanesan ne’e nia sente moras makas iha nia isin no nia rasik bolu nia oan mane ida atu buti nia isin, nia sente di’ak tia maibé la kleur de’it nia sente moras makas iha nia hirus matan no kabun laran, ami família deside lori ba ospitál maibé iha dalan la konsege salva nia vida maibé nia husik ona mundu ne’e”, Rogerio Lobato dehan ba Jornalista-sira iha Delta Nova Dili, segunda ne’e.
Aban, mate isin Luis Lobato lori ona ba Lerema
Rogerio Lobato informa, mate-isin aban lori ona ba Suku Leorema Postu Administrativu Bazartete Munsípiu Liquiça hodi lori ba halot iha fatin ikus semitériu leorema.
“Ohin to’o kalan ami-nia alin, ami-nia maun, ami-nia tiun Luis Lobato nia mate isin sei tau iha ne’e atu nune’e família parente sira bele mai vizita ikus liu, aban dader lori ba misa iha Katedral Dili lori liu kedan ba Leorema tau iha ne’ebá kinta semana ne’e foin mak halot nia mate-isin”, Rogerio Lobato adianta.
Nia dehan, to’o iha Leorema sei toba kalan ida tuir ezijénsia povu Leorema nian atu halo omenajen ikus ba saudozu no sei hein mós família balu mai hosi rai-liur.
“Ami tenke lori saudozu ba halot iha Leorema tanba família Lobato nian barak halot iha ne’ebá, Saudozu Luis Lobato nia aman, inan halot hotu iha Leorema uluk kedan nia sei moris mós nia hakarak mate halot iha Leorema besik nia inan aman, lakoi atu do’ok hosi inan aman,” nia esplika.
Nia hatutan, halot mate isin Lobato iha Leorema la’os falta konsiderasaun ba Jardin eroi maibé Leorema mós partense ba Timor-Leste no ida ne’e mak desizaun halot ikus iha Leorema.
Biografia badak saudozu Luis Lobato
Luis Lobato moris iha Leorema 12 dezembru 1962 oan hosi Paulo Freitas Lobato no Silvina de Sousa no Luis Lobato hanesan oan dalahat hosi maun alin na’in-12.
Luis Lobato hahú nia eskola primaria iha Soibada iha tinan 1969 to’o remata no la konsege kontinua tan ba oin tanba hasoru kedan funu bo’ot iha tinan 1975 hasoru invazaun Indonezia.
Ho nune’e iha tinan 1988 Saudozu deside hodi ba hala’o estudu iha Jakarta Indonezia hasai kursu iha Infremeiru no iha Indonezia Saudozu envolve iha organizasaun rezistensia sira hodi partisipa iha rede klandestina to’o fila hikas mai Timor-Leste.
Iha tinan 2002 bainhira I Governu Konstitusionál ne’ebé lidara hosi Primeiru Ministru Marí Bin Amude Alkatiri Saudozu asume kargu hanesan Vise Ministru Saúde to’o termina iha 2006.
Bainhira iha 2007 ba leten Saudozu servisu de’it iha rai laran maibé la envolve iha kargu ruma no iha tinan 2017 Saudozu nafatin hetan fiar hosi VII Governu Konstitusionál hodi asume hikas knar Vise Ministru Saúde maibé fulan sia de’it.
Saudozu hakotu nia peregrinasaun iha mundu ne’e iha 18 juñu madrugada iha Dili no Saudozu asume hela kargu prinsipál’ hanesan Kordenadór Partidu Fretilin Munisípiu Liquiça.
Maske asume hela kargu ne’e Comite Central Fretilin (CCF-sigla portugés) husu atu lori Saudozu ba presta nia omenajen ikus iha CCF maibé família rasik deside la lori ba no lori de’it ba Saudozu nia moris fatin Leorema.
Jornalista: Hortencio Sanchez
Editór : Zezito Silva
