DILI, 19 juñu 2023 (TATOLI) – Prezidente Tribunál Rekursu (PTR) Deolindo dos Santos konsidera rekursu Juiz sei menus.
“Agora daudaun iha Juiz 34 mak efetivu, auditór ne’ebé halo auditoria iha Kamara Konta 28, ofisiál justisa 87, funsionáriu iha Tribunál sira iha123”, Deolindo dos Santos dehan iha nia intervesaun durante fó pose ba Juiz Administradór foun nain haat ne’ebé hala’o iha Tribunál Rekursu Caicoli, segunda ne’e
Nia dehan, iha tempu badak sei fó pose ba ofsiál justisa 24, ne’ebé termina ona sira nian estudu iha Sentru Formasaun Juridiku no Judisiriáriu no Ofisiál Justisa ne’ebé atu prepara hela formasaun foun ba Ofsial Justisa 25 no mós formasaun kandidatura ba juiz 22.
“Ita espera katak iha tinan oin la hetan problema ita sei hetan mós ofisiál justisa hosi númeru ne’ebé sira agora frekuenta hela formasaun iha Sentru Juridiku Judisiáriu”, nia dehan.
Nia esplika, hosi númeru ne’e la sufisiente nafatin tanba tuir lei organizasaun judisiáriu ne’ebé parlamentu foin aprova katak presiza pelumenus juiz karreira nain haat atu bele halo servisu Supremu Tribunál Justisa, presiza Juiz karreira Juiz nain sia atu halo servisu iha futuru Tribunál Rekursu no mós presiza Juizes pelumenus 70-resin atu servisu iha Tribunál Judisiál Primeira Instánsia sira tuir lei organizasaun judisiál haruka.
“Tanba ida ne’e mak Konsellu Superiór Majistratura Judisiál nian obrigasaun atu husu ba Governu ne’ebé sei mosu iha tempu badak, atu mós kontinu formasaun ba Ofisiál Justisa no mós Juiz sira ne’ebé ke iha atu priénse kuadru sira iha Tribunál hanesan ohin ha’u temi ba”, Deolindo adianta.
Deolindo mós preokupa ba kondisaun materiál no ekipamentu sira iha tribunál sira menus tebes liuliu ekipamentu ba informátika, sistema gravasaun no sira seluk.
Jornalista: Natalino Costa
Editór : Zezito Silva
