Amu Papa Francisco hato’o sentidu kondolénsia ba PM ho família sira
DILI, DILI, 21 juñu 2023 (TATOLI) – Amu Papa Francisco hato’o sentidu kondolénsia ba Primeiru-Ministru Taur Matan Ruak ne’ebé lakon nia Espoza amadu.
”Amu Papa Francisco hato’o sentidu kondolénsia ba Primeiru-Ministru Taur Matan Ruak ne’ebé lakon nia Espoza amadu”, mensajen Amu Papa nian lee husi Reprezentante Santa Sé iha Timor-Leste Marco Sprizzi iha okaziaun Misa Requiem iha igreja Balide, ohin.
Espoza Primeiru-Ministru Isabel da Costa Ferreira hakotu iis iha domingu (18/06/2023, tuku 20:48 OTL iha nia rezidénsia Metiaut, Dili.
Isabel Ferreira remata nia peregrinasaun iha mundu ho idade 49 no sofre kankru interstinu iha faze ikus (terminadu).
Saudoza Isabel Ferreira hakoi iha Semitériu Públiku Bekussi Dili hafoin hala’o misa Rekiem iha Igreja Parokia Nossa Senhira Imculada da Conceicao Balide iha tuku 15: 00 WTL, 21 Junu 2023.
Isabel da Costa Ferreira moris iha Same, Munisípiu Manufahi iha 15 Abril 1974, Saudoza nu’udar advogadu, polítiku, eis deputadu no kandidatu iha Eleisaun Prezidensial tinan 2022. Mateus Ferreira no Ana Flora dé Jesus Ferreira nia oan-segundu husi maun-alin nain-13.
Nia estuda lei iha Indonezia no dedika nia moris barak liu ba asuntu direitus humanus, hodi fó sai abuzu ne’ebé komete durante okupasaun Indonezia nian.
Isabel da Costa Ferreira no Taur Matan Ruak kaben iha fulan-maiu 2001 no iha oan-na’in tolu, labarik-mane ida naran Queshadip Ruak Ferreira dé Vasconcelos no labarik-feto na’in rua naran Lola Ruak Ferreira dé Vasconcelos no Tamarisa Ruak Ferreira dé Vasconcelos.
Jornalista : Felicidade Ximenes
Editór : Zezito Silva
