Ekipa profisionál saúde sensibiliza ona moras rabies ba komunidade fronteirisa
DILI, 22 juñu 2023 (TATOLI) – Diretora Jerál Prestasaun Saúde iha Ministériu Saúde, Odete da Silva Viegas, hateten ekipa profisionál saúde sira halo ona sensibilizasaun informasaun kona-ba moras rabies ba komunidade sira iha área fronteirisa.
“Ita-nia ekipa sira ba ona fronteira, halo ona mekanismu koordenasaun no halo mós dizemina informasaun ba área fronteira sira liuliu ba moras rabies nian, ita espera katak tempu badak ita bele konklui ita-nia planu sira ne’e”, Odete da Silva Viegas informa ba TATOLI iha nia kna’ar fatin, ohin.
Nia afirma, relasiona ho moras raiba ka rabies, sai ona preokupasaun tanba nasaun Indonézia liuliu NNT deteta kazu ema mate tanba virus ida ne’e. Entaun Ministériu Saúde halao ona enkontru koordenasaun no preparasaun ho liña ministeriál hotu ho ajénsia sira ne’ebé iha ho objetivu atu haree liu ba planu kontijénsia integardu ida entre ministériu relevante sira.
“Ida ne’e ita hatene katak Ministériu Saúde la’os primeira vez prepara ba situasaun sira hanesan ne’e maibé prepara ba covid-19, ita iha planu kontijénsia integradu no antes ida ne’e ita mós iha komisaun nasionál surtu ne’ebé estabelesidu husi MS iha 2010”, nia esplika.
Nia afirma, situasaun emerjénsia saúde publika, MS sempre iha kolaborasaun ho parseiru ajénsia sira no mós liña ministeriál hodi halo enkontru ikus nian, aprezenta ona planu ne’ebé hanesan planu kada sesaun atu haree ba risku komunikasaun ba enumerasaun hodi haree ba alvu sira, sese mak tenke hetan vasina.
“Depois haree mós kona-ba vasina tanba vasina mak bele prevene ba moras ida ne’e, entaun ita koalia kona-ba sosa vasina no mós ita koalia kona-ba kapasitasaun ba ema sira ne’ebé mak atu atende ba moras ida ne’e mak husi Ministériu Agrikultura no Peska ho Ministériu Saúde.
Infelizmente planu ne’e ami konklui tanba planu detalladu ho orsamentu presiza tau nia fatin entaun ami sei ko’alia kona-ba aprezentasaun ba kazu jestaun hanesan asu ruma tata ema, saida mak ita tenke halo no medida preventiva ne’e oinsá”, nia hateten.
Nia salienta, advokasia no dizeminasaun informasaun ba baze no MS nia prioridade ba munisípiu sira ne’ebé mak iha fronteira hanesan Maliana, Suai no Oe-Cusse maibé la ses mós iha nível nasionál tenke fahe informasaun atu sira bele hatene.
“Alvu atu simu vasina mak ema sira iha fronteira no se mak sai alvu ba ida ne’e ita sei suspeitu signifika metru hira husi uma ida ne’ebé, asu sira ne’e ita deteta entaun ida ne’e mak sai prioridade atu vasina”, nia esplika.
Tanba ne’e, Odete dehan, ema idade hira mak atu simu vasina ne’e konforme ba ekipa sira haree hamutuk fila fali planu sira ne’e, konklui ona sira bele hato’o informasaun no submete ba Ministra Saúde atu bele hetan aprovasaun.
Jornalista : Felicidade Ximenes
Editór : Zezito Silva
