G7⁺ halo observasaun ba Eleisaun iha Sierra Leone
DILI, 22 juñu 2023 (TATOLI) – Organizasaun g7⁺ hala’o misaun Observasaun eleitorál iha Freetown, kapital hosi Sierra Leone atu observa Eleisaun Jerál ne’ebé sei realiza loron (24 juñu 2023) mai ne’e.
Misaun ne’e lidera hosi Habib Mayar, Adjunto Sekretáriu Jerál g7⁺, membru ba delegasaun kompostu hosi Felix Piedade, Diretór Operasionál g7⁺, Domingos Barreto, Vise-Prezidente hosi (Komisaun Nasionál Eleisaun (CNE-sigla portugés) no Michael Clarke, Adjunto Diretór ba Monitorizaun no Avaliasaun hosi CNE Liberia.
“Eleisaun iha Sierra Leone ne’e nudar eleisaun ba dalima ona iha nasaun ne’e desde funu sívil ne’ebé akontese iha Sierra Leone iha 2002. Iha loron (24 juñu votasaun sei halo ba eleisaun haat maka hanesan eleisaun ba, Prezidente Repúblika Parlamentu Nasionál, Prezident Munisípiu no Kamara Munisipál”, tenik iha komunikadu ne’ebé Agência TATOLI asesu, kinta ne’e.
Eleisaun ne’e, partidu polítiku hamutuk 13 mak sei kompete no populasaun hamutuk ema millaun 3,3 mak rejistu atu tuir votasaun iha eleisaun ne’e.
Misaun observasaun eleitorál hosi g7⁺ nian sei observa abertura, votasaun, enseramentu no prosesu kontajen iha parte ne’ebé diferente, konsidera prinsípiu objetividade, imparsiálidade, independente no profesionalizmu.
Misaun ne’e mós sei hasoru Prezidente hosi Komisaun ba eleisaun Sierra Leone nian no sei submete relatóriu ba komisaun ba eleisaun depois votasaun.
Grupo g7⁺ estabelese iha tinan 2010 nudar organizasaun Inter-Governamentál hosi nasaun sira ne’ebé afeta husi konflitu, atu ajuda sira atinje páz no estabilidade liuliu aprende ba malu iha área ne’ebé liga ba harii páz no harii Estadu tuir prosesu nasaun ida-ida nian no halo advokasia ba envolvimentu sira nian.
Organizasaun ne’e ninian kuartél jerál iha Timor-Leste, g7⁺ lidera hosi Ministru Planeamentu no Dezenvolvimentu Ekonomia, Siera Leone nian.
Grupo ne’e kompostu hosi Afghanistan, Burundi, Republika Afrika Sentral, Chad, Comoros, Côte d’Ivoire, Demokrátika Repúblika Kongo, Guinea, Guinea-Bissau, Haiti, Liberia, Papua Nova Guine, São Tomé e Príncipe, Sierra Leone, Somalia, Ilha Solomon, Sudan de Sul, Timor-Leste, Togo ho Yemen.
Organizasaun g7⁺ institutionaliza observasaun ba eleisaun iha 22 Marsu 2023, nudar parte ida hosi fahe esperiénsia no aprende ba malu iha ninian programa kooperasaun entre nasaun frajíl no nasaun frajíl seluk ho objetivu sira hanesan tuir mai ne’e.
Observa prosesu eleisaun iha membru nasaun g7⁺ nian iha maneira nebe imparsiál, profisionál, independente no ho étika.
Kontribui ba haforsa konsolidasaun demokrasia, páz no dezenvolvimentu liuhosi observa eleisaun iha membru g7⁺ sira.
Jornalista: Hortencio Sanchez
Editór : Zezito Silva
